Read Chichewa Buku Lopatulika Bible 2014 YOBU 5 Bible Online

YOBU 5 - Chichewa Buku Lopatulika Bible 2014 bible

YOBU 5

¹Itana tsono; pali wina wakukuyankha kodi? Ndipo udzatembenukira kwa yani wa oyera mtimawo?

²Pakuti mkwiyo umapha wopusa, ndi nsanje imakantha wopanda pake.

³Ndinapenya wopusa woyala mizu; koma pomwepo ndinatemberera pokhala pake.

⁴Ana ake akhala otekeseka, napsinjika kuchipata, wopanda wina wakuwapulumutsa.

⁵Zokolola zao anjala azidya, azitenga ngakhale kuminga, ndi aludzu ameza chuma chao.

⁶Pakuti nsautso sutuluka m'fumbi, ndi mavuto saphuka m'nthaka.

⁷Koma munthu abadwira mavuto, monga mbaliwali zikwera ziuluzika.

⁸Koma ine ndikadafuna Mulungu, ndikadaikira mlandu wanga Mulungu;

⁹amene achita zazikulu ndi zosalondoleka, zinthu zodabwitsa zosawerengeka.

¹⁰Amene avumbitsa mvula panthaka, natumiza madzi paminda;

¹¹kuika opeputsidwa pamalo ponyamuka, kuti iwo a maliro akwezedwe kosatekeseka.

¹²Apititsa pachabe ziwembu za ochenjera, kuti manja ao sakhoza kuchita chopangana chao.

¹³Akola eni nzeru m'kuchenjera kwao, ndi uphungu wa opotoka mtima usonthokera pachabe.

¹⁴Iwo akomana ndi mdima pali dzuwa, nayambasa dzuwa lili pakati pamtu monga usiku.

¹⁵Apulumutsa aumphawi kulupanga la kukamwa kwao, ndi kudzanja la wamphamvu.

¹⁶Potero aumphawi ali nacho chiyembekezo, ndi mphulupulu yatsekedwa pakamwa.

¹⁷Taona, wodala munthu amene Mulungu amdzudzula; chifukwa chake usapeputsa kulanga kwa Wamphamvuyonse.

¹⁸Pakuti apweteka, namanganso mabala; alasa, ndi manja ake omwe apoletsa.

¹⁹Adzakupulumutsa m'masautso asanu ndi limodzi; chinkana mwa asanu ndi awiri palibe choipa chidzakukhudza.

²⁰Adzakuombola kuimfa m'njala, ndi kumphamvu ya lupanga m'nkhondo.

²¹Udzabisikira mkwapulo wa lilime, sudzachiopanso chikadza chipasuko.

²²Chipasuko ndi njala udzaziseka; ngakhale zilombo za padziko osaziopa.

²³Pakuti udzakhala ndi pangano ndi miyala ya kuthengo; ndi nyama za kuthengo zidzakhala nawe mumtendere.

²⁴Ndipo udzapeza kuti pahema pako mpa mtendere; nudzazonda za m'banja mwako osasowapo kanthu.

²⁵Udzapezanso kuti mbeu zako zidzachuluka, ndi obala iwe ngati zitsamba za padziko.

²⁶Udzafika kumanda utakalamba, monga abwera nao mtolo wa tirigu m'nyengo yake.

²⁷Taona, ichi tachifunafuna, chili chotero; uchimvere, nuchidziwire wekha.