Read Chichewa Buku Lopatulika Bible 2014 YOBU 7 Bible Online

YOBU 7 - Chichewa Buku Lopatulika Bible 2014 bible

YOBU 7

¹Kodi munthu alibe nkhondo kunja kuno? Kodi masiku ake sakunga masiku a wolembedwa ntchito?

²Monga kapolo woliralira mthunzi, monga wolembedwa ntchito ayembekezera mphotho yake,

³momwemo anandilowetsa miyezi yopanda pake. Nandiikiratu zowawa usiku ndi usiku.

⁴Ndigona pansi, ndikuti, Ndidzauka liti? Koma usiku undikulira; ndipo ndimapalapata mpaka mbandakucha.

⁵Mnofu wanga wavala mphutsi ndi nkanambo zadothi; khungu langa lang'ambika, nilinyansa.

⁶Masiku anga afulumira koposa mphindo ya muomba, apitirira opanda chiyembekezo.

⁷Kumbukira kuti moyo wanga ndiwo mphepo, diso langa silidzaonanso chokoma.

⁸Diso la amene andiona silidzandionanso, maso ako adzandipenyetsetsa, koma ine palibe.

⁹Mtambo wapita watha, momwemo wakutsikira kumanda sadzakwerakonso.

¹⁰Sadzabweranso kunyumba yake, osamdziwanso malo ake.

¹¹Potero sindidzaletsa pakamwa panga; ndidzalankhula popsinjika mu mzimu mwanga; ndidzadandaula pakuwawa mtima wanga.

¹²Ndine nyanja kodi, kapena chinjoka cha m'nyanja, kuti Inu mundiikira odikira?

¹³Ndikati, Pakama panga mpondisangalatsa, pogona panga padzachepsa chondidandaulitsa;

¹⁴pamenepo mundiopsa ndi maloto, nimundichititsa mantha ndi masomphenya;

¹⁵potero moyo wanga usankha kupotedwa, ndi imfa, koposa mafupa anga awa.

¹⁶Ndinyansidwa nao moyo wanga; sindidzakhala ndi moyo chikhalire; mundileke; pakuti masiku anga ndi achabe.

¹⁷Munthu ndani kuti mumkuze, ndi kuti muike mtima wanu pa iye,

¹⁸ndi kuti mucheze naye m'mawa ndi m'mawa, ndi kumuyesa nthawi zonse?

¹⁹Mukana kundichokera kufikira liti, kapena kundileka mpaka nditameza dovu?

²⁰Ngati ndachimwa, ndingachitire Inu chiyani, Inu wodikira anthu? Mwandiikiranji ndikhale chandamali chanu? Kuti ndikhale kwa ine ndekha katundu?

²¹Mulekeranji kukhululukira kulakwa kwanga ndi kundichotsera mphulupulu yanga? Popeza tsopano ndidzagona kufumbi; mudzandifunafuna, koma ine palibe.