Read Chichewa Buku Lopatulika Bible 2014 YOBU 8 Bible Online

YOBU 8 - Chichewa Buku Lopatulika Bible 2014 bible

YOBU 8

¹Pamenepo anayankha Bilidadi Msuki, nati,

²Udzanena izi kufikira liti? Ndipo mau a pakamwa pako adzakhala ngati namondwe kufikira liti?

³Ngati Mulungu akhotetsa chiweruzo? Ngati Wamphamvuyonse akhotetsa mlandu?

⁴Chinkana ana ako anamchimwira Iye, ndipo anawapereka mwa kulakwa kwao;

⁵koma ukafunitsitsa Mulungu, ndi kupembedza Wamphamvuyonse;

⁶ukakhala woyera ndi woongoka mtima, zoonadi adzakugalamukira tsopano, ndi kupindulitsa pokhala pako polungama.

⁷Ndipo chinkana chiyambi chako chinali chaching'ono, chitsiriziro chako chidzachuluka kwambiri.

⁸Pakuti ufunsire tsono mbadwo wapitawo, nusamalire zimene makolo ao adazisanthula.

⁹Pakuti ife ndife adzulo, osadziwa kanthu, popeza masiku athu a pa dziko lapansi ndiwo ngati mthunzi;

¹⁰amene aja sangakuphunzitse, ndi kukufotokozera, ndi kutulutsa mau a mumtima mwao?

¹¹Ngati gumbwa aphuka popanda chinyontho? Ngati manchedza amera popanda madzi?

¹²Akali auwisi, sanawacheke, auma, asanaume mathengo onse ena.

¹³Momwemo mayendedwe a onse oiwala Mulungu; ndi chiyembekezo cha onyoza Mulungu; chidzatayika.

¹⁴Kulimbika mtima kwake kudzathyoka, chikhulupiriro chake chikunga nyumba ya kangaude.

¹⁵Adzatsamira nyumba yake, koma yosamlimbira; adzaiumirira koma yosakhalitsa.

¹⁶Akhala wamuwisi pali dzuwa, ndi nthambi zake zitulukira pamunda pake.

¹⁷Mizu yake iyangayanga pa kasupe wamadzi, apenyerera pokhalapo miyala.

¹⁸Akamuononga kumchotsa pamalo pake, padzamkana, ndi kuti, Sindinakuona.

¹⁹Taona, ichi ndicho chomkondweretsa panjira pake, ndi panthaka padzamera ena.

²⁰Taona, Mulungu sakana munthu wangwiro; kapena kugwiriziza ochita zoipa.

²¹Koma adzadzaza m'kamwa mwako ndi kuseka, ndi milomo yako kufuula.

²²Iwo akudana nawe adzavala manyazi; ndi hema wa oipa adzakhala kuli zii.