Read Chichewa Buku Lopatulika Bible 2014 YOBU 9 Bible Online

YOBU 9 - Chichewa Buku Lopatulika Bible 2014 bible

YOBU 9

¹Pamenepo Yobu anayankha, nati,

²Zoona, ndidziwa kuti chili chotero. Koma munthu adzakhala wolungama bwanji kwa Mulungu?

³Akafuna Iye kutsutsana naye, sadzambwezera Iye mau amodzi onse mwa chikwi.

⁴Ndiye wa mtima wanzeru, ndi wa mphamvu yaikulu; ndaniyo anadziumitsa mtima pa Iye, nakhala nao mtendere?

⁵Ndiye amene asuntha mapiri, osachidziwa iwo, amene amagubuduza mu mkwiyo wake.

⁶Amene agwedeza dziko lapansi lichoke m'malo mwake, ndi mizati yake injenjemere.

⁷Amene alamulira dzuwa ndipo silituluka, nakomera nyenyezi chizindikiro chakuzitsekera.

⁸Woyala thambo yekha, naponda pa mafunde a panyanja.

⁹Wolenga Mlalang'amba, Akamwiniatsatana, ndi Nsangwe, ndi Kumpotosimpita.

¹⁰Wochita zazikulu zosasanthulika, ndi zodabwitsa zosawerengeka.

¹¹Taona, Mulungu apita pali ine, koma sindimpenya; napitirira, koma osamzindikira ine.

¹²Taona, akwatula, adzambwezetsa ndani? Adzanena naye ndani, Mulikuchita chiyani?

¹³Mulungu sadzabweza mkwiyo wake; athandizi odzikuza awerama pansi pa Iye.

¹⁴Nanga ine tsono ndidzamyankha bwanji, ndi kusankha mau anga akutsutsana ndi Iye?

¹⁵Ameneyo, chinkana ndikadakhala wolungama, sindikadamyankha; ndikadangompembedza wondiweruza ine.

¹⁶Ndikadaitana, ndipo akadayankha Iye, koma sindikadakhulupirira kuti Iye wamvera mau anga.

¹⁷Pakuti andithyola ndi mkuntho, nachulukitsa mabala anga kopanda chifukwa.

¹⁸Sandilola kuti ndipume, koma andidzaza ndi zowawa.

¹⁹Tikanena za mphamvu, si ndiye wamphamvu? Tikanena za kuweruza, adzamuitana ndani?

²⁰Chinkana ndikhala wolungama, pakamwa panga padzanditsutsa; chinkana ndikhala wangwiro, padzanditsutsa wamphulupulu.

²¹Chinkana ndikhala wangwiro, sindidzisamalira mwini, ndipeputsa moyo wanga.

²²Kuli chimodzimodzi monsemo, m'mwemo ndikuti Iye aononga wangwiro ndi woipa pamodzi.

²³Mkwapulo ukapha modzidzimutsa, adzaseka tsoka la wosachimwa.

²⁴Dziko lapansi laperekedwa m'dzanja la woipa; aphimba maso a oweruza ake. Ngati sindiye, pali yaninso?

²⁵Tsopano masiku anga afulumira kuposa wamtokoma; athawa osaona chokoma.

²⁶Apitirira ngati zombo zaliwiro; ngati mphungu igudukira chakudya chake.

²⁷Ndikati, Ndidzaiwala chondidandaulitsa, ndidzasintha nkhope yanga yachisoni, ndidzasekerera.

²⁸Pamenepo ndiopa zisoni zanga zonse, ndidziwa kuti simudzandiyesa wosachimwa.

²⁹Mlandu udzanditsutsa; potero ndigwire ntchito chabe chifukwa ninji?

³⁰Ndikasamba madzi a chipale chofewa ndi kuyeretsa manja anga ndi sopo.

³¹Mudzandiviikanso muli zoola, ndi zovala zanga zidzanyansidwa nane.

³²Pakuti sindiye munthu, monga ine, kuti ndimyankhe. Kuti tikomane mlandu.

³³Palibe wakutiweruza, wakutisanjika ife tonse awiri manja ake.

³⁴Andichotsere ndodo yake, choopsa chake chisandichititse mantha;

³⁵kuti ndinene, osamuopa, pakuti sinditero monga umo ndili.