Read Chichewa Buku Lopatulika Bible 2014 MASALIMO 103 Bible Online

MASALIMO 103 - Chichewa Buku Lopatulika Bible 2014 bible

MASALIMO 103

¹Salimo la Davide. Lemekeza Yehova, moyo wanga; ndi zonse za m'kati mwanga zilemekeze dzina lake loyera.

²Lemekeza Yehova, moyo wanga, ndi kusaiwala zokoma zake zonse atichitirazi:

³Amene akhululukira mphulupulu zako zonse; nachiritsa nthenda zako zonse;

⁴amene aombola moyo wako ungaonongeke; nakuveka korona wa chifundo ndi nsoni zokoma:

⁵Amene akhutitsa m'kamwa mwako ndi zabwino; nabweza ubwana wako unge mphungu.

⁶Yehova achitira onse osautsidwa chilungamo ndi chiweruzo.

⁷Analangiza Mose njira zake, ndi ana a Israele machitidwe ake.

⁸Yehova ndiye wa nsoni zokoma ndi wachisomo, wosakwiya msanga, ndi wa chifundo chochuluka.

⁹Sadzatsutsana nao nthawi zonse; ndipo sadzasunga mkwiyo wake kosatha.

¹⁰Sanatichitira monga mwa zolakwa zathu, kapena kutibwezera monga mwa mphulupulu zathu.

¹¹Pakuti monga m'mwamba mutalikira ndi dziko lapansi, motero chifundo chake chikulira iwo akumuopa Iye.

¹²Monga kum'mawa kutanimpha ndi kumadzulo, momwemo anatisiyanitsira kutali zolakwa zathu.

¹³Monga atate achitira ana ake chifundo, Yehova achitira chifundo iwo akumuopa Iye.

¹⁴Popeza adziwa mapangidwe athu; akumbukira kuti ife ndife fumbi.

¹⁵Koma munthu, masiku ake akunga udzu; aphuka monga duwa la kuthengo.

¹⁶Pakuti mphepo ikapitapo pakhala palibe: Ndi malo ake salidziwanso.

¹⁷Koma chifundo cha Yehova ndicho choyambira nthawi yosayamba kufikira nthawi yosatha kwa iwo akumuopa Iye, ndi chilungamo chake kufikira kwa ana a ana;

¹⁸kwa iwo akusunga chipangano chake, ndi kwa iwo akukumbukira malangizo ake kuwachita.

¹⁹Yehova anakhazika mpando wachifumu wake Kumwamba; ndi ufumu wake uchita mphamvu ponsepo.

²⁰Lemekezani Yehova, inu angelo ake; a mphamvu zolimba, akuchita mau ake, akumvera liu la mau ake.

²¹Lemekezani Yehova, inu makamu ake onse; inu atumiki ake akuchita chomkondweretsa Iye.

²²Lemekezani Yehova, inu, ntchito zake zonse, ponseponse pali ufumu wake: Lemekeza Yehova, moyo wanga iwe.