Read Chichewa Buku Lopatulika Bible 2014 MASALIMO 104 Bible Online

MASALIMO 104 - Chichewa Buku Lopatulika Bible 2014 bible

MASALIMO 104

¹Lemekeza Yehova, moyo wanga; Yehova, Mulungu wanga, Inu ndinu wamkulukulu;

²muvala ulemu ndi chifumu. Amene mudzikuta nako kuunika monga ndi chovala; ndi kuyala thambo ngati nsalu yotchinga.

³Amene alumikiza mitanda ya zipinda zake m'madzi; naika makongwa akhale agaleta ake; nayenda pa mapiko a mphepo.

⁴Amene ayesa mphepo amithenga ake; lawi la moto atumiki ake;

⁵anakhazika dziko lapansi pa maziko ake, silidzagwedezeka kunthawi yonse.

⁶Mudalikuta ndi nyanja ngati ndi chovala; madzi anafikira pamwamba pa mapiri.

⁷Pa kudzudzula kwanu anathawa; anathawa msanga liu la bingu lanu;

⁸anakwera m'mapiri, anatsikira m'zigwa, kufikira malo mudawakonzeratu.

⁹Munaika malire kuti asapitirireko; kuti asabwererenso kuphimba dziko lapansi.

¹⁰Atumiza akasupe alowe m'makwawa; ayenda pakati pa mapiri:

¹¹Zimamwamo nyama zonse za kuthengo; mbidzi zipherako ludzu lao.

¹²Mbalame za mlengalenga zifatsa pamenepo, zimaimba pakati pa mitawi.

¹³Iye amwetsa mapiri mochokera m'zipinda zake: Dziko lakhuta zipatso za ntchito zanu.

¹⁴Ameretsa msipu ziudye ng'ombe, ndi zitsamba achite nazo munthu; natulutse chakudya chochokera m'nthaka;

¹⁵ndi vinyo wokondweretsa mtima wa munthu, ndi mafuta akunyezimiritsa nkhope yake, ndi mkate wakulimbitsa mtima wa munthu.

¹⁶Mitengo ya Yehova yadzala ndi madzi; mikungudza ya ku Lebanoni imene anaioka;

¹⁷m'mwemo mbalame zimanga zisa zao; pokhala chumba mpa mitengo ya mikungudza.

¹⁸Mapiri atali ndiwo ayenera zinkhoma; pamatanthwe mpothawirapo mbira.

¹⁹Anaika mwezi nyengo zake; dzuwa lidziwa polowera pake.

²⁰Muika mdima ndipo pali usiku; pamenepo zituluka zilombo zonse za m'thengo.

²¹Misona ya mkango ibangula potsata nyama yao, nifuna chakudya chao kwa Mulungu.

²²Potuluka dzuwa, zithawa, zigona pansi m'ngaka mwao.

²³Pamenepo munthu atulukira kuntchito yake, nagwiritsa kufikira madzulo.

²⁴Ntchito zanu zichulukadi, Yehova! Munazichita zonse mwanzeru; dziko lapansi lidzala nacho chuma chanu.

²⁵Nyanja siyo, yaikulu ndi yachitando, m'mwemo muli zokwawa zosawerengeka; zamoyo zazing'ono ndi zazikulu.

²⁶M'mwemo muyenda zombo; ndi Leviyatani amene munamlenga aseweremo.

²⁷Izi zonse zikulindirirani, muzipatse chakudya chao pa nyengo yake.

²⁸Chimene muzipatsa zigwira; mufumbatula dzanja lanu, zikhuta zabwino.

²⁹Mukabisa nkhope yanu, ziopsedwa; mukalanda mpweya wao, zikufa, nizibwerera kufumbi kwao.

³⁰Potumizira mzimu wanu, zilengedwa; ndipo mukonzanso nkhope ya dziko lapansi.

³¹Ulemerero wa Yehova ukhale kosatha; Yehova akondwere mu ntchito zake;

³²amene apenyerera pa dziko lapansi, ndipo linjenjemera; akhudza mapiri, ndipo afuka.

³³Ndidzaimbira Yehova m'moyo mwanga: ndidzaimbira Mulungu wanga zomlemekeza pokhala ndilipo.

³⁴Pomlingirira Iye pandikonde; ndidzakondwera mwa Yehova.

³⁵Ochimwa athedwe kudziko lapansi, ndi oipa asakhalenso. Yamika Yehova, moyo wanga. Aleluya.