Read Chichewa Buku Lopatulika Bible 2014 MASALIMO 105 Bible Online

MASALIMO 105 - Chichewa Buku Lopatulika Bible 2014 bible

MASALIMO 105

¹Yamikani Yehova, itanirani pa dzina lake; bukitsani mwa mitundu ya anthu zochita Iye.

²Muimbireni, muimbireni zomlemekeza; fotokozerani zodabwitsa zake zonse.

³Mudzitamandire ndi dzina lake loyera: mitima yao ya iwo ofunsira Yehova ikondwere.

⁴Funani Yehova, ndi mphamvu yake; funsirani nkhope yake nthawi zonse.

⁵Kumbukirani zodabwitsa zake adazichita; zizindikiro zake ndi maweruzo a pakamwa pake;

⁶inu mbeu za Abrahamu, mtumiki wake, inu ana a Yakobo, osankhika ake.

⁷Iye ndiye Yehova, Mulungu wathu; maweruzo ake akhala pa dziko lonse lapansi.

⁸Akumbukira chipangano chake kosatha, mauwo anawalamulira mibadwo zikwi;

⁹chipanganocho anapangana ndi Abrahamu, ndi lumbiro lake ndi Isaki;

¹⁰ndipo anachiimikira Yakobo, chikhale malemba, chikhale chipangano chosatha kwa Israele.

¹¹Ndi kunena kuti, Ndidzakupatsa iwe dziko la Kanani, gawo la cholandira chako;

¹²pokhala iwo anthu owerengeka, inde, anthu pang'ono, ndi alendo m'mwemo;

¹³nayendayenda kuchokera mtundu wina kufikira mtundu wina, kuchokera ufumu wina kufikira anthu ena.

¹⁴Sanalola munthu awasautse; ndipo anadzudzula mafumu chifukwa cha iwowa.

¹⁵Ndi kuti, Musamakhudza odzozedwa anga, musamachitira choipa aneneri anga.

¹⁶Ndipo anaitana njala igwere dziko; anathyola mchirikizo wonse wa mkate.

¹⁷Anawatsogozeratu munthu; anamgulitsa Yosefe akhale kapolo:

¹⁸Anapweteka miyendo yake ndi matangadza; anamgoneka m'unyolo;

¹⁹kufikira nyengo yakuchitika maneno ake; mau a Yehova anamuyesa.

²⁰Mfumuyo anatuma munthu nammasula; woweruza mitundu ya anthu anamtsegulira.

²¹Anamuika akhale woyang'anira nyumba yake, ndi woweruza wa pa zake zonse:

²²Amange nduna zake iye mwini, alangize akulu ake adziwe nzeru.

²³Pamenepo Israele analowa m'Ejipito; ndi Yakobo anakhala mlendo m'dziko la Hamu.

²⁴Ndipo anachulukitsatu mtundu wa anthu ake, nawapatsa mphamvu yoposa owasautsa.

²⁵Anasanduliza mitima yao, kuti adane nao anthu ake, kuti achite monyenga ndi atumiki ake.

²⁶Anatuma Mose mtumiki wake, ndi Aroni amene adamsankha.

²⁷Anaika pakati pao zizindikiro zake, ndi zodabwitsa m'dziko la Hamu.

²⁸Anatumiza mdima ndipo kunada; ndipo sanapikisane nao mau ake.

²⁹Anasanduliza madzi ao akhale mwazi, naphanso nsomba zao.

³⁰Dziko lao linachuluka achule, m'zipinda zomwe za mafumu ao.

³¹Ananena, ndipo inadza mitambo ya ntchentche, ndi nsabwe kufikira m'malire ao onse.

³²Anawapatsa mvula yamatalala, lawi la moto m'dziko lao.

³³Ndipo anapanda mipesa yao, ndi mikuyu yao; nathyola mitengo kufikira m'malire ao onse.

³⁴Ananena, ndipo linadza dzombe ndi mphuchi, ndizo zosawerengeka,

³⁵ndipo zinadya zitsamba zonse za m'dziko mwao, zinadyanso zipatso za m'nthaka mwao.

³⁶Ndipo Iye anapha achisamba onse m'dziko mwao, choyambira cha mphamvu yao yonse.

³⁷Ndipo anawatulutsa pamodzi ndi siliva ndi golide: ndi mwa mafuko ao munalibe mmodzi wokhumudwa.

³⁸Ejipito anakondwera pakuchoka iwo; popeza kuopsa kwao kudawagwera.

³⁹Anayala mtambo uwaphimbe; ndi moto uunikire usiku.

⁴⁰Anafunsa ndipo Iye anadzetsa zinziri, nawakhutitsa mkate wakumwamba.

⁴¹Anatsegula pathanthwe, anatulukamo madzi; nayenda pouma ngati mtsinje.

⁴²Popeza anakumbukira mau ake oyera, ndi Abrahamu mtumiki wake.

⁴³Potero anatulutsa anthu ake ndi kusekerera, osankhika ake ndi kufuula mokondwera.

⁴⁴Ndipo anawapatsa maiko a amitundu; iwo ndipo analanda zipatso za ntchito ya anthu:

⁴⁵Kuti asamalire malemba ake, nasunge malamulo ake. Aleluya.