Read Chichewa Buku Lopatulika Bible 2014 MASALIMO 107 Bible Online

MASALIMO 107 - Chichewa Buku Lopatulika Bible 2014 bible

MASALIMO 107

¹Yamikani Yehova pakuti Iye ndiye wabwino; pakuti chifundo chake nchosatha.

²Atere oomboledwa a Yehova, amene anawaombola m'dzanja la wosautsa;

³nawasokolotsa kumaiko, kuchokera kum'mawa ndi kumadzulo, kumpoto ndi kunyanja.

⁴Anasokera m'chipululu, m'njira yopanda anthu; osapeza mudzi wokhalamo.

⁵Anamva njala ndi ludzu, moyo wao unakomoka m'kati mwao.

⁶ Pamenepo anafuulira kwa Yehova mumsauko mwao, ndipo anawalanditsa m'kupsinjika kwao.

⁷Ndipo anawatsogolera pa njira yolunjika, kuti amuke kumudzi wokhalamo.

⁸Ayamike Yehova chifukwa cha chifundo chake, ndi zodabwitsa zake za kwa ana a anthu!

⁹Pakuti akhutitsa mtima wolakalaka, nadzaza mtima wanjala ndi zabwino.

¹⁰Iwo akukhala mumdima ndi mu mthunzi wa imfa, omangika ndi kuzunzika ndi chitsulo;

¹¹popeza anapikisana nao mau a Mulungu, napeputsa uphungu wa Wam'mwambamwamba;

¹²kotero kuti anagonjetsa mtima wao ndi chovuta; iwowa anakhumudwa koma panalibe mthandizi.

¹³Pamenepo anafuulira kwa Yehova mumsauko mwao, ndipo anawapulumutsa m'kupsinjika kwao.

¹⁴Anawatulutsa mumdima ndi mu mthunzi wa imfa, nadula zomangira zao.

¹⁵Ayamike Yehova chifukwa cha chifundo chake, ndi zodabwitsa zake za kwa ana a anthu!

¹⁶Popeza adaswa zitseko zamkuwa, nathyola mipiringidzo yachitsulo.

¹⁷Anthu opusa azunzika chifukwa cha zolakwa zao, ndi chifukwa cha mphulupulu zao.

¹⁸Mtima wao unyansidwa nacho chakudya chilichonse; ndipo ayandikira zipata za imfa.

¹⁹Pamenepo afuulira kwa Yehova m'kusauka kwao, ndipo awapulumutsa m'kupsinjika kwao.

²⁰Atumiza mau ake nawachiritsa, nawapulumutsa ku chionongeko chao.

²¹Ayamike Yehova chifukwa cha chifundo chake, ndi zodabwitsa zake za kwa ana a anthu!

²²Ndipo apereke nsembe zachiyamiko, nafotokozere ntchito zake ndi kufuula mokondwera.

²³Iwo akutsikira kunyanja nalowa m'zombo, akuchita ntchito zao pa madzi aakulu.

²⁴Iwowa apenya ntchito za Yehova, ndi zodabwitsa zake m'madzi ozama.

²⁵Popeza anena, nautsa namondwe, amene autsa mafunde ake.

²⁶Akwera kuthambo, atsikira kozama; mtima wao usungunuka nacho choipacho.

²⁷Adzandira napambanitsa miyendo ngati munthu woledzera, nathedwa nzeru konse.

²⁸Pamenepo afuulira kwa Yehova m'kusauka kwao, ndipo awatulutsa m'kupsinjika kwao.

²⁹Asanduliza namondwe akhale bata, kotero kuti mafunde ake atonthole.

³⁰Pamenepo akondwera, popeza pagwa bata; ndipo Iye awatsogolera kudooko afunako.

³¹Ayamike Yehova chifukwa cha chifundo chake, ndi zodabwitsa zake za kwa ana a anthu!

³²Amkwezenso mu msonkhano wa anthu, namlemekeze pokhala akulu.

³³Asanduliza mitsinje ikhale chipululu, ndi akasupe a madzi akhale nthaka youma.

³⁴Dziko la zipatso, likhale lakhulo, chifukwa cha choipa cha iwo okhalamo.

³⁵Asanduliza chipululu chikhale thawale, ndi dziko louma likhale akasupe a madzi.

³⁶Ndi apo akhalitsa anjala, kuti amangeko mudzi wokhalamo anthu;

³⁷nafese m'minda, naoke mipesa, ndiyo yakubala zipatso zolemeza.

³⁸Ndipo awadalitsa, kotero kuti achuluka kwambiri; osachepsanso zoweta zao.

³⁹Koma achepanso, nawerama, chifukwa cha chisautso, choipa ndi chisoni.

⁴⁰Atsanulira chimpepulo pa akulu, nawasokeretsa m'chipululu mopanda njira.

⁴¹Koma aika waumphawi pamsanje posazunzika, nampatsa mabanja ngati gulu la nkhosa.

⁴²Oongoka mtima adzachiona nadzasekera; koma chosalungama chonse chitseka pakamwa pake.

⁴³Wokhala nazo nzeru asamalire izi, ndipo azindikire zachifundo za Yehova.