Read Chichewa Buku Lopatulika Bible 2014 MASALIMO 108 Bible Online

MASALIMO 108 - Chichewa Buku Lopatulika Bible 2014 bible

MASALIMO 108

¹Nyimbo. Salimo la Davide. Wakhazikika mtima wanga, Mulungu; ndidzaimba, inde ndidzaimba zolemekeza, ndiko ulemerero wanga.

²Galamukani, chisakasa ndi zeze; ndidzauka ndekha mamawa.

³Ndidzakuyamikani mwa mitundu ya anthu, Yehova: ndipo ndidzaimba zakukulemekezani mwa anthu.

⁴Pakuti chifundo chanu nchachikulu kupitirira kumwamba, ndi choonadi chanu kufikira mitambo.

⁵Kwezekani pamwamba pa thambo, Mulungu; ndi ulemerero wanu pamwamba pa dziko lonse lapansi,

⁶kuti okondedwa anu alanditsidwe, pulumutsani ndi dzanja lanu lamanja ndipo mutivomereze.

⁷Mulungu analankhula m'chiyero chake; ndidzakondwerera: ndidzagawa Sekemu; ndidzayesa muyeso chigwa cha Sukoti.

⁸Giliyadi ndi wanga, Manase ndi wanga; ndi Efuremu ndiye mphamvu ya mutu wanga; Yuda ndiye wolamulira wanga.

⁹Mowabu ndiye mkhate wanga; pa Edomu ndidzaponya nsapato yanga; ndidzafuulira Filistiya.

¹⁰Adzandifikitsa ndani m'mudzi wa m'linga? Adzanditsogolera ndani ku Edomu?

¹¹Si ndinu Mulungu, amene mwatitaya osatuluka nao magulu athu?

¹²Tithandizeni mumsauko; pakuti chipulumutso cha munthu ndi chabe.

¹³Mwa Mulungu tidzachita molimbika mtima: Ndipo Iye adzapondereza otisautsa.