Read Chichewa Buku Lopatulika Bible 2014 MASALIMO 115 Bible Online

MASALIMO 115 - Chichewa Buku Lopatulika Bible 2014 bible

MASALIMO 115

¹Kwa ife ai, Yehova, kwa ife ai, koma kwa dzina lanu patsani ulemerero, chifukwa cha chifundo chanu, ndi choonadi chanu.

²Aneneranji amitundu, Ali kuti Mulungu wao?

³Koma Mulungu wathu ndiye ali m'mwamba; achita chilichonse chimkonda.

⁴Mafano ao ndiwo a siliva ndi golide, ntchito za manja a anthu.

⁵Pakamwa ali napo, koma osalankhula; maso ali nao, koma osapenya;

⁶makutu ali nao, koma osamva; mphuno ali nazo, koma osanunkhiza;

⁷manja ali nao, koma osagwira; mapazi ali nao, koma osayenda; kapena sanena pammero pao.

⁸Adzafanana nao iwo akuwapanga; ndi onse akuwakhulupirira.

⁹Israele, khulupirira Yehova: Ndiye mthandizi wao ndi chikopa chao.

¹⁰Nyumba ya Aroni, khulupirira Yehova: Ndiye mthandizi wao, ndi chikopa chao.

¹¹Inu akuopa Yehova, khulupirirani Yehova; ndiye mthandizi wao ndi chikopa chao.

¹²Yehova watikumbukira; adzatidalitsa: adzadalitsa nyumba ya Israele; adzadalitsa nyumba ya Aroni.

¹³Adzadalitsa iwo akuopa Yehova, aang'ono ndi aakulu.

¹⁴Yehova akuonjezereni dalitso, inu ndi ana anu.

¹⁵Odalitsika inu a kwa Yehova, wakulenga kumwamba ndi dziko lapansi.

¹⁶Kunena za kumwamba, kumwamba ndiko kwa Yehova; koma dziko lapansi analipereka kwa ana a anthu.

¹⁷Akufa salemekeza Yehova, kapena aliyense wakutsikira kuli chete:

¹⁸Koma ife tidzalemekeza Yehova kuyambira tsopano kufikira nthawi yonse. Aleluya.