Read Chichewa Buku Lopatulika Bible 2014 MASALIMO 119 Bible Online

MASALIMO 119 - Chichewa Buku Lopatulika Bible 2014 bible

MASALIMO 119

¹Odala angwiro m'mayendedwe ao, akuyenda m'chilamulo cha Yehova.

²Odala iwo akusunga mboni zake, akumfuna ndi mtima wonse;

³inde, sachita chosalungama; ayenda m'njira zake.

⁴Inu munatilamulira, tisamalire malangizo anu ndi changu.

⁵Ha? Mwenzi zitakhazikika njira zanga kuti ndisamalire malemba anu.

⁶Pamenepo sindidzachita manyazi, pakupenyerera malamulo anu onse.

⁷Ndidzakuyamikani ndi mtima woongoka, pakuphunzira maweruzo anu olungama.

⁸Ndidzasamalira malemba anu: Musandisiye ndithu.

⁹Mnyamata adzayeretsa mayendedwe ake bwanji? Akawasamalira monga mwa mau anu.

¹⁰Ndinakufunani ndi mtima wanga wonse; ndisasokere kusiyana nao malamulo anu.

¹¹Ndinawabisa mau anu mumtima mwanga, kuti ndisalakwire Inu.

¹²Inu ndinu wodala Yehova; ndiphunzitseni malemba anu.

¹³Ndinafotokozera ndi milomo yanga maweruzo onse a pakamwa panu.

¹⁴Ndinakondwera m'njira ya mboni zanu, koposa ndi chuma chonse.

¹⁵Ndidzalingirira pa malangizo anu, ndi kupenyerera mayendedwe anu.

¹⁶Ndidzadzikondweretsa nao malemba anu; sindidzaiwala mau anu.

¹⁷Muchitire chokoma mtumiki wanu kuti ndikhale ndi moyo; ndipo ndidzasamalira mau anu.

¹⁸Munditsegulire maso, kuti ndipenye zodabwitsa za m'chilamulo chanu.

¹⁹Ine ndine mlendo pa dziko lapansi; musandibisire malamulo anu.

²⁰Mtima wanga wasweka ndi kukhumba maweruzo anu nyengo zonse.

²¹Munadzudzula odzikuza otembereredwa, iwo akusokera kusiyana nao malamulo anu.

²²Mundichotsere chotonza, ndi chimpepulo; pakuti ndinasunga mboni zanu.

²³Nduna zomwe zinakhala zondineneza; koma mtumiki wanu analingirira malemba anu.

²⁴Mboni zanu zomwe ndizo zondikondwetsa, ndizo zondipangira nzeru.

²⁵Moyo wanga umamatika ndi fumbi; mundipatse moyo monga mwa mau anu.

²⁶Ndinafotokozera njira zanga, ndipo munandiyankha: Mundiphunzitse malemba anu.

²⁷Mundizindikiritse njira ya malangizo anu; kuti ndilingalire zodabwitsa zanu.

²⁸Moyo wanga wasungunuka ndi chisoni: Mundilimbitse monga mwa mau anu.

²⁹Mundichotsere njira ya chinyengo; nimundipatse mwachifundo chilamulo chanu.

³⁰Ndinasankha njira yokhulupirika; ndinaika maweruzo anu pamaso panga.

³¹Ndimamatika nazo mboni zanu; musandichititse manyazi, Yehova.

³²Ndidzathamangira njira ya malamulo anu, mutakulitsa mtima wanga.

³³Mundiphunzitse, Yehova, njira ya malemba anu; ndidzaisunga kufikira kutha kwake.

³⁴Mundizindikiritse, ndipo ndidzasunga malamulo anu; ndidzawasamalira ndi mtima wanga wonse.

³⁵Mundiyendetse mopita malamulo anu; pakuti ndikondwera m'menemo.

³⁶Lingitsani mtima wanga kumboni zanu, si ku chisiriro ai.

³⁷Muchititse mlubza maso anga ndisapenye zachabe, mundipatse moyo mu njira yanu.

³⁸Limbitsirani mtumiki wanu mau anu, ndiye wodzipereka kukuopani.

³⁹Mundipatutsire chotonza changa ndichiopacho; popeza maweruzo anu ndi okoma.

⁴⁰Taonani, ndinalira malangizo anu; mundipatse moyo mwa chilungamo chanu.

⁴¹Ndipo chifundo chanu chindidzere, Yehova, ndi chipulumutso chanu, monga mwa mau anu.

⁴²Kuti ndikhale nao mau akuyankha wonditonza; popeza ndikhulupirira mau anu.

⁴³Ndipo musandichotsere ndithu mau a choonadi pakamwa panga; pakuti ndinayembekeza maweruzo anu.

⁴⁴Potero ndidzasamalira malamulo anu chisamalire kunthawi za nthawi.

⁴⁵Ndipo ndidzayenda mwaufulu; popeza ndinafuna malangizo anu.

⁴⁶Ndidzalankhulanso za umboni wanu pamaso pa mafumu, osachitapo manyazi.

⁴⁷Ndipo ndidzadzikondweretsa nao malamulo anu, amene ndiwakonda.

⁴⁸Ndidzakwezanso manja anga ku malamulo anu, amene ndiwakonda; ndipo ndidzalingalira pa malemba anu.

⁴⁹Kumbukirani mau a kwa mtumiki wanu, amene munandiyembekezetsa nao.

⁵⁰Chitonthozo changa m'kuzunzika kwanga ndi ichi; pakuti mau anu anandipatsa moyo.

⁵¹Odzikuza anandinyoza kwambiri: koma sindinapatukanso nacho chilamulo chanu.

⁵²Ndinakumbukira maweruzo anu kuyambira kale, Yehova, ndipo ndinadzitonthoza.

⁵³Ndinasumwa kwakukulu, chifukwa cha oipa akusiya chilamulo chanu.

⁵⁴Malemba anu anakhala nyimbo zanga m'nyumba ya ulendo wanga.

⁵⁵Usiku ndinakumbukira dzina lanu, Yehova, ndipo ndinasamalira chilamulo chanu.

⁵⁶Ichi ndinali nacho, popeza ndinasunga malangizo anu.

⁵⁷Yehova ndiye gawo langa: Ndinati ndidzasunga mau anu.

⁵⁸Ndinapemba pankhope panu ndi mtima wanga wonse: Mundichitire chifundo monga mwa mau anu.

⁵⁹Ndinaganizira njira zanga, ndipo ndinabweza mapazi anga atsate mboni zanu.

⁶⁰Ndinafulumira, osachedwa, kusamalira malamulo anu.

⁶¹Anandikulunga nazo zingwe za oipa; koma sindinaiwala chilamulo chanu.

⁶²Pakati pa usiku ndidzauka kukuyamikani chifukwa cha maweruzo anu olungama.

⁶³Ine ndine wakuyanjana nao onse akukuopani, ndi iwo akusamalira malangizo anu.

⁶⁴Dziko lapansi lidzala nacho chifundo chanu, Yehova; mundiphunzitse malemba anu.

⁶⁵Munachitira mtumiki wanu chokoma, Yehova, monga mwa mau anu.

⁶⁶Mundiphunzitse chisiyanitso ndi nzeru; pakuti ndinakhulupirira malamulo anu.

⁶⁷Ndisanazunzidwe ndinasokera; koma tsopano ndisamalira mau anu.

⁶⁸Inu ndinu wabwino, ndi wakuchita zabwino; mundiphunzitse malemba anu.

⁶⁹Odzikuza anandipangira bodza: Ndidzasunga malangizo anu ndi mtima wanga wonse.

⁷⁰Mtima wao unona ngati mafuta; koma ine ndikondwera nacho chilamulo chanu.

⁷¹Kundikomera kuti ndinazunzidwa; kuti ndiphunzire malemba anu.

⁷²Chilamulo cha pakamwa panu chindikomera koposa golide ndi siliva zikwizikwi.

⁷³Manja anu anandilenga nandiumba; mundizindikiritse, kuti ndiphunzire malemba anu.

⁷⁴Iwo amene akuopani adzandiona ine nadzakondwera; popeza ndayembekezera mau anu.

⁷⁵Ndidziwa kuti maweruzo anu ndiwo olungama, Yehova, ndi kuti munandizunza ine mokhulupirika.

⁷⁶Chifundo chanu chikhaletu chakunditonthoza, ndikupemphani, monga mwa mau anu kwa mtumiki wanu.

⁷⁷Nsoni zokoma zanu zindidzere, kuti ndikhale ndi moyo; popeza chilamulo chanu chindikondweretsa.

⁷⁸Odzikuza achite manyazi, popeza anandichitira monyenga ndi bodza: Koma ine ndidzalingalira malangizo anu.

⁷⁹Iwo akuopa Inu abwere kwa ine, ndipo adzadziwa mboni zanu.

⁸⁰Mtima wanga ukhale wangwiro m'malemba anu; kuti ndisachite manyazi.

⁸¹Moyo wanga unakomoka ndi kukhumba chipulumutso chanu: Ndinayembekezera mau anu.

⁸²Maso anga anatha mphamvu ndi kukhumba mau anu, ndikuti, Mudzanditonthoza liti?

⁸³Popeza ndakhala ngati thumba lofukirira; koma sindiiwala malemba anu.

⁸⁴Masiku a mtumiki wanu ndiwo angati? Mudzaweruza liti iwo akundilondola koipa?

⁸⁵Odzikuza anandikumbira mbuna, ndiwo osasamalira chilamulo chanu.

⁸⁶Malamulo anu onse ngokhulupirika; andilondola nalo bodza; ndithandizeni.

⁸⁷Akadandithera pa dziko lapansi; koma ine sindinasiya malangizo anu.

⁸⁸Mundipatse moyo monga mwa chifundo chanu; ndipo ndidzasamalira mboni ya pakamwa panu.

⁸⁹Mau anu aikika kumwamba, kosatha, Yehova.

⁹⁰Chikhulupiriko chanu chifikira mibadwomibadwo; munakhazikitsa dziko lapansi, ndipo likhalitsa.

⁹¹Kunena za maweruzo anu alimbikira kufikira lero; pakuti onsewa ndiwo atumiki anu.

⁹²Chilamulo chanu chikadapanda kukhala chikondweretso changa, ndikadatayika m'kuzunzika kwanga.

⁹³Sindidzaiwala malangizo anu nthawi zonse; popeza munandipatsa nao moyo.

⁹⁴Ine ndine wanu, ndipulumutseni pakuti ndinafuna malangizo anu.

⁹⁵Oipa anandilalira kundiononga; koma ndizindikira mboni zanu.

⁹⁶Ndinapenya malekezero ake a ungwiro wonse; koma lamulo lanu ndi lotakasuka ndithu.

⁹⁷Ha! Ndikondadi chilamulo chanu; ndilingiriramo ine tsiku lonse.

⁹⁸Malamulo anu andipatsa nzeru yakuposa adani anga; pakuti akhala nane chikhalire.

⁹⁹Ndili nayo nzeru yakuposa aphunzitsi anga onse; pakuti ndilingalira mboni zanu.

¹⁰⁰Ndizindikira koposa okalamba popeza ndinasunga malangizo anu.

¹⁰¹Ndinaletsa mapazi anga njira iliyonse yaoipa, kuti ndisamalire mau anu.

¹⁰²Sindinapatukana nao maweruzo anu; pakuti Inu munandiphunzitsa.

¹⁰³Mau anu azunadi powalawa ine! Koposa uchi m'kamwa mwanga.

¹⁰⁴Malangizo anu andizindikiritsa; chifukwa chake ndidana nao mayendedwe onse achinyengo.

¹⁰⁵Mau anu ndiwo nyali ya ku mapazi anga, ndi kuunika kwa panjira panga.

¹⁰⁶Ndinalumbira, ndipo ndinatsimikiza mtima, kuti ndidzasamalira maweruzo anu olungama.

¹⁰⁷Ndazunzika kwambiri: Ndipatseni moyo, Yehova, monga mwa mau anu.

¹⁰⁸Landirani, Yehova, zopereka zaufulu za pakamwa panga, ndipo ndiphunzitseni maweruzo anu.

¹⁰⁹Moyo wanga ukhala m'dzanja langa chikhalire; koma sindiiwala chilamulo chanu.

¹¹⁰Oipa ananditchera msampha; koma sindinasokera m'malangizo anu.

¹¹¹Ndinalandira mboni zanu zikhale cholandira chosatha; pakuti ndizo zokondweretsa mtima wanga.

¹¹²Ndinalingitsa mtima wanga uchite malemba anu, kosatha, kufikira chimaliziro.

¹¹³Ndidana nao a mitima iwiri; koma ndikonda chilamulo chanu.

¹¹⁴Inu ndinu pobisalapo panga, ndi chikopa changa; ndiyembekezera mau anu.

¹¹⁵Mundichokere ochita zoipa inu; kuti ndisunge malamulo a Mulungu wanga.

¹¹⁶Mundichirikize monga mwa mau anu, kuti ndikhale ndi moyo; ndipo ndisachite manyazi pa chiyembekezo changa.

¹¹⁷Mundigwirizize ndipo ndidzapulumutsidwa, ndipo ndidzasamalira malemba anu chisamalire.

¹¹⁸Mupepula onse akusokera m'malemba anu; popeza chinyengo chao ndi bodza.

¹¹⁹Muchotsa oipa onse a pa dziko lapansi ngati mphala: Chifukwa chake ndikonda mboni zanu.

¹²⁰Thupi langa linjenjemera ndi kuopa Inu; ndipo ndichita mantha nao maweruzo anu.

¹²¹Ndinachita chiweruzo ndi chilungamo; musandisiyira akundisautsa.

¹²²Mumkhalire chikole mtumiki wanu chimkomere; odzikuza asandisautse.

¹²³Maso anga anatha mphamvu pofuna chipulumutso chanu, ndi mau a chilungamo chanu.

¹²⁴Muchitire mtumiki wanu monga mwa chifundo chanu, ndipo ndiphunzitseni malemba anu.

¹²⁵Ine ndine mtumiki wanu, ndizindikiritseni; kuti ndidziwe mboni zanu.

¹²⁶Yafika nyengo yakuti Yehova achite kanthu; pakuti anaswa chilamulo chanu.

¹²⁷Chifukwa chake ndikonda malamulo anu koposa golide, inde golide woyengeka.

¹²⁸Chifukwa chake ndiyesa ngolunjika malangizo anu onse akunena zonse; koma ndidana nazo njira zonse zonyenga.

¹²⁹Mboni zanu nzodabwitsa; chifukwa chake moyo wanga uzisunga.

¹³⁰Potsegulira mau anu paunikira; kuzindikiritsa opusa.

¹³¹Ndinatsegula pakamwa panga, ndi kupuma wefuwefu; popeza ndinakhumba malamulo anu.

¹³²Munditembenukire, ndi kundichitira chifundo, monga mumatero nao akukonda dzina lanu.

¹³³Khazikitsani mapazi anga m'mau anu; ndipo zisandigonjetse zopanda pake zilizonse.

¹³⁴Mundiombole kunsautso ya munthu: Ndipo ndidzasamalira malangizo anu.

¹³⁵Muwalitse nkhope yanu pa mtumiki wanu; ndipo mundiphunzitse malemba anu.

¹³⁶Maso anga atsitsa mitsinje ya madzi, popeza sasamalira chilamulo chanu.

¹³⁷Inu ndinu wolungama, Yehova, ndipo maweruzo anu ndiwo olunjika.

¹³⁸Mboni zanuzo mudazilamulira zili zolungama ndi zokhulupirika ndithu.

¹³⁹Changu changa chinandithera, popeza akundisautsa anaiwala mau anu.

¹⁴⁰Mau anu ngoyera ndithu; ndi mtumiki wanu awakonda.

¹⁴¹Wamng'ono ine, ndi wopepulidwa; koma sindiiwala malemba anu.

¹⁴²Chilungamo chanu ndicho chilungamo chosatha; ndi chilamulo chanu ndicho choonadi.

¹⁴³Kusautsika ndi kupsinjika kwandigwera; koma malamulo anu ndiwo ondikondweretsa ine.

¹⁴⁴Mboni zanu ndizo zolungama kosatha; mundizindikiritse izi, ndipo ndidzakhala ndi moyo.

¹⁴⁵Ndinaitana ndi mtima wanga wonse; mundiyankhe, Yehova; ndidzasunga malemba anu.

¹⁴⁶Ndinaitanira Inu; ndipulumutseni, ndipo ndidzasamalira mboni zanu.

¹⁴⁷Ndinafuula kusanake: ndinayembekezera mau anu.

¹⁴⁸Maso anga anakumana ndi maulonda a usiku, kuti ndilingirire mau anu.

¹⁴⁹Imvani liu langa monga mwa chifundo chanu; mundipatse moyo monga mwa kuweruza kwanu, Yehova.

¹⁵⁰Otsata zachiwembu andiyandikira; akhala kutali ndi chilamulo chanu.

¹⁵¹Inu muli pafupi, Yehova; ndipo malamulo anu onse ndiwo choonadi.

¹⁵²Kuyambira kale ndinadziwa mu mboni zanu, kuti munazikhazika kosatha,

¹⁵³Penyani kuzunzika kwanga, nimundilanditse; pakuti sindiiwala chilamulo chanu.

¹⁵⁴Mundinenere mlandu wanga, nimundiombole; mundipatse moyo monga mwa mau anu.

¹⁵⁵Chipulumutso chitalikira oipa; popeza safuna malemba anu.

¹⁵⁶Zachifundo zanu ndi zazikulu, Yehova; mundipatse moyo monga mwa maweruzo anu.

¹⁵⁷Ondilondola ndi ondisautsa ndiwo ambiri; koma sindinapatukana nazo mboni zanu.

¹⁵⁸Ndinapenya ochita monyenga, ndipo ndinanyansidwa nao; popeza sasamalira mau anu.

¹⁵⁹Penyani kuti ndikonda malangizo anu; mundipatse moyo, Yehova, monga mwa chifundo chanu.

¹⁶⁰Chiwerengero cha mau anu ndicho choonadi; ndi maweruzo anu olungama onse akhala kosatha.

¹⁶¹Nduna zinandilondola kopanda chifukwa; koma mtima wanga uchita mantha nao mau anu.

¹⁶²Ndikondwera nao mau anu, ngati munthu wakupeza zofunkha zambiri.

¹⁶³Ndidana nalo bodza ndi kunyansidwa nalo; koma ndikonda chilamulo chanu.

¹⁶⁴Ndikulemekezani kasanu ndi kawiri, tsiku limodzi, chifukwa cha maweruzo anu alungama.

¹⁶⁵Akukonda chilamulo chanu ali nao mtendere wambiri; ndipo alibe chokhumudwitsa.

¹⁶⁶Ndinayembekeza chipulumutso chanu, Yehova, ndipo ndinachita malamulo anu.

¹⁶⁷Moyo wanga unasamalira mboni zanu; ndipo ndizikonda kwambiri.

¹⁶⁸Ndinasamalira malangizo anu ndi mboni zanu; popeza njira zanga zonse zili pamaso panu.

¹⁶⁹Kufuula kwanga kuyandikire pamaso panu, Yehova; mundizindikiritse monga mwa mau anu.

¹⁷⁰Kupemba kwanga kudze pamaso panu; mundilanditse monga mwa mau anu.

¹⁷¹Milomo yanga itulutse chilemekezo; popeza mundiphunzitsa malemba anu.

¹⁷²Lilime langa liimbire mau anu; pakuti malamulo anu onse ndiwo olungama.

¹⁷³Dzanja lanu likhale lakundithandiza; popeza ndinasankha malangizo anu.

¹⁷⁴Ndinakhumba chipulumutso chanu, Yehova; ndipo chilamulo chanu ndicho chondikondweretsa.

¹⁷⁵Mzimu wanga ukhale ndi moyo, ndipo udzakulemekezani; ndipo maweruzo anu andithandize.

¹⁷⁶Ndinasochera ngati nkhosa yotayika; funani mtumiki wanu; pakuti sindiiwala malamulo anu.