Read Chichewa Buku Lopatulika Bible 2014 MASALIMO 132 Bible Online

MASALIMO 132 - Chichewa Buku Lopatulika Bible 2014 bible

MASALIMO 132

¹Nyimbo yokwerera. Yehova, kumbukirani Davide kuzunzika kwake konse.

²Kuti analumbira Yehova, nawindira Wamphamvuyo wa Yakobo, ndi kuti,

³Ngati ndidzalowa pakhomo pa nyumba yanga, ngati ndidzakwera pa kama logonapo;

⁴ngati ndidzalola maso anga agone, kapena zikope zanga ziodzere;

⁵kufikira nditapezera Yehova malo, chokhalamo Wamphamvuyo wa Yakobo?

⁶Taonani, tinachimva m'Efurata; tinachipeza kuchidikha cha kunkhalango.

⁷Tidzalowa mokhalamo Iye; tidzagwadira kumpando wa mapazi ake.

⁸Ukani, Yehova, lowani ku mpumulo wanu; Inu ndi hema wa mphamvu yanu.

⁹Ansembe anu avale chilungamo; ndi okondedwa anu afuule mokondwera.

¹⁰Chifukwa cha Davide mtumiki wanu musabweze nkhope ya wodzozedwa wanu.

¹¹Yehova analumbira Davide zoona; sadzalibweza; ndi kuti, Wa iwo okhala zipatso za thupi lako ndidzaika pa mpando wachifumu wako.

¹²Ana ako akasunga chipangano changa ndi mboni yanga imene ndidzawaphunzitsa, ana aonso adzakhala pa mpando wanu kunthawi zonse,

¹³pakuti Yehova anasankha Ziyoni; analikhumba likhale pokhala pake; ndi kuti,

¹⁴Pampumulo panga mpano posatha, Pano ndidzakhala; pakuti ndakhumbapo.

¹⁵Ndidzadalitsatu chakudya chake; aumphawi ake ndidzawakhutitsa ndi mkate.

¹⁶Ndipo ansembe ake ndidzawaveka ndi chipulumutso: Ndi okondedwa ake adzafuulitsa mokondwera.

¹⁷Apo ndidzaphukitsira Davide nyanga; ndakonzeratu wodzozedwa wanga nyali.

¹⁸Ndidzawaveka adani ake ndi manyazi; koma pa iyeyu korona wake adzamveka.