Read Chichewa Buku Lopatulika Bible 2014 MASALIMO 135 Bible Online

MASALIMO 135 - Chichewa Buku Lopatulika Bible 2014 bible

MASALIMO 135

¹Aleluya; Lemekezani dzina la Yehova! Lemekezani inu atumiki a Yehova.

²Inu akuimirira m'nyumba ya Yehova, m'mabwalo a nyumba ya Mulungu wathu.

³Lemekezani Yehova; pakuti Yehova ndiye wabwino; muimbire zolemekeza dzina lake; pakuti nkokondweretsa kutero.

⁴Pakuti Yehova anadzisankhira Yakobo, Israele, akhale chuma chake chenicheni.

⁵Pakuti ndidziwa kuti Yehova ndi wamkulu, ndi Ambuye wathu aposa milungu yonse.

⁶Chilichonse chimkonda Yehova achichita, kumwamba ndi pa dziko lapansi, m'nyanja ndi mozama monse.

⁷Akweza mitambo ichokere ku malekezero a dziko lapansi; ang'animitsa mphezi zidzetse mvula; atulutsa mphepo mosungira mwake.

⁸Anapanda oyamba a Ejipito, kuyambira munthu kufikira zoweta.

⁹Anatumiza zizindikiro ndi zodabwitsa pakati pako, Ejipito iwe, pa Farao ndi pa omtumikira onse.

¹⁰Ndiye amene anapanda amitundu ambiri, napha mafumu amphamvu;

¹¹Sihoni mfumu ya Aamori, ndi Ogi mfumu ya Basani, ndi maufumu onse a Kanani:

¹²Ndipo anapereka dziko lao likhale chosiyira, chosiyira cha kwa Israele anthu ake.

¹³Dzina lanu, Yehova, likhala kosatha; chikumbukiro chanu, Yehova, kufikira mibadwomibadwo.

¹⁴Pakuti Yehova adzaweruza anthu ake, koma adzaleka atumiki ake.

¹⁵Mafano a amitundu ndiwo siliva ndi golide, ntchito ya manja a anthu.

¹⁶Pakamwa ali napo koma osalankhula; maso ali nao, koma osapenya;

¹⁷makutu ali nao, koma osamva; inde, pakamwa pao palibe mpweya.

¹⁸Akuwapanga adzafanana nao; inde, onse akuwakhulupirira.

¹⁹A nyumba ya Israele inu, lemekezani Yehova: A nyumba ya Aroni inu, lemekezani Yehova:

²⁰A nyumba ya Levi inu, lemekezani Yehova: Inu akuopa Yehova, lemekezani Yehova.

²¹Alemekezedwe Yehova kuchokera m'Ziyoni, amene akhala m'Yerusalemu. Aleluya.