Read Chichewa Buku Lopatulika Bible 2014 MASALIMO 139 Bible Online

MASALIMO 139 - Chichewa Buku Lopatulika Bible 2014 bible

MASALIMO 139

¹Kwa Mkulu wa Nyimbo; Salimo la Davide. Munandisanthula, Yehova, nimundidziwa.

²Inu mudziwa kukhala kwanga ndi kuuka kwanga, muzindikira lingaliro langa muli kutali.

³Muyesa popita ine ndi pogona ine, ndi njira zanga zonse muzolowerana nazo.

⁴Pakuti asanafike mau pa lilime langa, taonani, Yehova, muwadziwa onse.

⁵Munandizinga kumbuyo ndi kumaso, nimunaika dzanja lanu pa ine.

⁶Kudziwa ichi kundilaka ndi kundidabwitsa: Kundikhalira patali, sindifikirako.

⁷Ndidzapita kuti kuzembera mzimu wanu? Kapena ndidzathawira kuti kuzembera nkhope yanu?

⁸Ndikakwera kunka kumwamba, muli komweko; kapena ndikadziyalira ku Gehena, taonani, muli komweko.

⁹Ndikadzitengera mapiko a mbandakucha, ndi kukhala ku malekezero a nyanja;

¹⁰kungakhale komweko dzanja lanu lidzanditsogolera, nilidzandigwira dzanja lanu lamanja.

¹¹Ndipo ndikati, Koma mdima undiphimbe, ndi kuunika kondizinga kukhale usiku.

¹²Ungakhale mdima sudetsa pamaso panu, koma usiku uwala ngati usana; mdima ukunga kuunika.

¹³Pakuti Inu munalenga impso zanga; munandiumba ndisanabadwe ine.

¹⁴Ndikuyamikani chifukwa kuti chipangidwe changa nchoopsa ndi chodabwitsa; ntchito zanu nzodabwitsa; moyo wanga uchidziwa ichi bwino ndithu.

¹⁵Thupi langa silinabisikira Inu popangidwa ine mobisika, poombedwa ine monga m'munsi mwake mwa dziko lapansi.

¹⁶Ndisanaumbidwe ine maso anu anandipenya, ziwalo zanga zonse zinalembedwa m'buku mwanu, masiku akuti ziumbidwe, pakalibe chimodzi cha izo.

¹⁷Potero, Mulungu, ndiziyesa zolingalira zanu za mtengo wake ndithu! Mawerengedwe ake ndi ambirimbiri!

¹⁸Ndikaziwerenga zichuluka koposa mchenga: Ndikauka ndikhalanso nanu.

¹⁹Indedi, mudzaomba woipa, Mulungu: Ndipo amuna inu okhumba mwazi, chokani kwa ine.

²⁰Popeza anena za Inu moipa, ndi adani anu atchula dzina lanu mwachabe.

²¹Kodi sindidana nao iwo akudana ndi Inu, Yehova? Ndipo kodi sindimva nao chisoni iwo akuukira Inu?

²²Ndidana nao ndi udani weniweni, ndiwayesa adani.

²³Mundisanthule, Mulungu, nimudziwe mtima wanga; mundiyese nimudziwe zolingalira zanga.

²⁴Ndipo mupenye ngati ndili nao mayendedwe oipa, nimunditsogolere pa njira yosatha.