Read Chichewa Buku Lopatulika Bible 2014 MASALIMO 142 Bible Online

MASALIMO 142 - Chichewa Buku Lopatulika Bible 2014 bible

MASALIMO 142

¹Chilangizo cha Davide, muja anakhala m'phanga; Pemphero. Ndifuula nalo liu langa kwa Yehova; ndi mau anga ndipemba kwa Yehova.

²Nditsanulira kudandaula kwanga pamaso pake; ndionetsa msauko wanga pamaso pake.

³Pamene mzimu wanga unakomoka m'kati mwanga, munadziwa njira yanga. M'njira ndiyendamo ananditchera msampha.

⁴Penyani kudzanja lamanja ndipo muone; palibe wondidziwa; pothawirapo pandisowa; palibe mmodzi wosamalira moyo wanga.

⁵Ndinafuulira kwa inu, Yehova; ndinati, Inu ndinu pothawirapo panga, gawo langa m'dziko la amoyo.

⁶Tamverani kufuula kwanga; popeza ndisauka kwambiri; ndilanditseni kwa iwo akundilondola; popeza andilaka.

⁷Tulutsani moyo wanga m'ndende, kuti ndiyamike dzina lanu; olungama adzandizinga; pakuti mudzandichitira zokoma.