Read Chichewa Buku Lopatulika Bible 2014 MASALIMO 144 Bible Online

MASALIMO 144 - Chichewa Buku Lopatulika Bible 2014 bible

MASALIMO 144

¹Salimo la Davide. Wolemekezeka Yehova thanthwe langa, wakuphunzitsa manja anga achite nkhondo, zala zanga zigwirane nao:

²Ndiye chifundo changa, ndi linga langa, msanje wanga, ndi Mpulumutsi wanga; chikopa changa, ndi Iye amene ndimtama; amene andigonjetsera anthu anga.

³Yehova, munthu ndani kuti mumdziwa? Mwana wa munthu kuti mumsamalira?

⁴Munthu akunga mpweya; masiku ake akunga mthunzi wopitirira.

⁵Weramutsani thambo lanu, Yehova, nimutsike: Khudzani mapiri ndipo adzafuka.

⁶Ng'animitsani mphezi, ndi kuwabalalitsa; tumizani mivi yanu, ndi kuwapirikitsa.

⁷Tulutsani manja anu kuchokera m'mwamba; ndikwatuleni ndi kundilanditsa kumadzi aakulu, kudzanja la alendo;

⁸amene pakamwa pao alankhula zachabe, ndi dzanja lao lamanja ndilo dzanja lachinyengo.

⁹Ndidzakuimbirani nyimbo yatsopano, Mulungu; pa chisakasa cha zingwe khumi ndidzaimbira zakukulemekezani.

¹⁰Ndiye amene apatsa mafumu chipulumutso: Amene alanditsa Davide mtumiki wake kulupanga loipa.

¹¹Ndilanditseni ndi kundipulumutsa kudzanja la alendo, amene pakamwa pao alankhula zachabe, ndi dzanja lao lamanja ndilo dzanja lachinyengo.

¹²Kuti ana athu amuna akhale ngati mmera udakula usanakhwime; ana athu akazi ngati nsanamira za kungodya, zosema zikometsere nyumba ya mfumu.

¹³Kuti nkhokwe zathu zidzale, kutipatsa za mitundumitundu; ndi kuti nkhosa zathu ziswane zikwizikwi, inde zikwi khumi kubusako.

¹⁴Kuti ng'ombe zathu zikhale zosenza katundu; ndi kuti pasakhale kupasula linga kapena kutulukamo, pasakhalenso kufuula m'makwalala athu.

¹⁵Odala anthu akuona zotere; odala anthu amene Mulungu wao ndi Yehova.