Read Chichewa Buku Lopatulika Bible 2014 MASALIMO 145 Bible Online

MASALIMO 145 - Chichewa Buku Lopatulika Bible 2014 bible

MASALIMO 145

¹Salimo lolemekeza; la Davide. Ndidzakukwezani Mulungu wanga, Mfumu; ndipo ndidzalemekeza dzina lanu kunthawi za nthawi.

²Masiku onse ndidzakuyamikani; ndi kulemekeza dzina lanu kunthawi za nthawi.

³Yehova ndi wamkulu, nayenera kulemekezedwa kwakukulu; ndi ukulu wake ngwosasanthulika.

⁴Mbadwo wina udzalemekezera ntchito zanu mbadwo unzake, ndipo udzalalikira zamphamvu zanu.

⁵Ndidzalingalira ulemerero waukulu wa ulemu wanu, ndi ntchito zanu zodabwitsa.

⁶Ndipo adzanenera mphamvu za ntchito zanu zoopsa; ndi ukulu wanu ndidzaufotokozera.

⁷Adzabukitsa chikumbukiro cha ubwino wanu waukulu, nadzaimbira chilungamo chanu.

⁸Yehova ndiye wachisomo, ndi wachifundo; osakwiya msanga, ndi wa chifundo chachikulu.

⁹Yehova achitira chokoma onse; ndi nsoni zokoma zake zigwera ntchito zake zonse.

¹⁰Ntchito zanu zonse zidzakuyamikani, Yehova; ndi okondedwa anu adzakulemekezani.

¹¹Adzanenera ulemerero wa ufumu wanu, adzalankhulira mphamvu yanu.

¹²Kudziwitsa ana a anthu zamphamvu zake, ndi ulemerero waukulu wa ufumu wake.

¹³Ufumu wanu ndiwo ufumu womka muyaya, ndi kuweruza kwanu kufikira mibadwo yonseyonse.

¹⁴Yehova agwiriziza onse akugwa, naongoletsa onse owerama.

¹⁵Maso a onse ayembekeza Inu; ndipo muwapatsa chakudya chao m'nyengo zao.

¹⁶Muolowetsa dzanja lanu, nimukwaniritsira zamoyo zonse chokhumba chao.

¹⁷Yehova ali wolungama m'njira zake zonse, ndi wachifundo m'ntchito zake zonse.

¹⁸Yehova ali pafupi ndi onse akuitanira kwa Iye, onse akuitanira kwa Iye m'choonadi.

¹⁹Adzachita chokhumba iwo akumuopa; nadzamva kufuula kwao, nadzawapulumutsa.

²⁰Yehova asunga onse akukondana naye; koma oipa onse adzawaononga.

²¹Pakamwa panga padzanena chilemekezo cha Yehova; ndi zinthu zonse zilemekeze dzina lake loyera kunthawi za nthawi.