Read Chichewa Buku Lopatulika Bible 2014 MASALIMO 17 Bible Online

MASALIMO 17 - Chichewa Buku Lopatulika Bible 2014 bible

MASALIMO 17

¹Pemphero la Davide. Yehova, imvani chilungamo, mverani mfuu wanga; tcherani khutu ku pemphero langa losatuluka m'milomo ya chinyengo.

²Pankhope panu patuluke chiweruzo changa; maso anu apenyerere zolunjika.

³Mwayesera mtima wanga; mwandizonda usiku; mwandisuntha, simupeza kanthu; mwatsimikiza mtima kuti m'kamwa mwanga simudzalakwa.

⁴Za machitidwe a anthu, ndachenjera ndi mau a milomo yanu ndingalowe njira za woononga.

⁵M'mayendedwe anga ndasunga mabande anu, mapazi anga sanaterereke.

⁶Ine ndinakuitanani, pakuti mudzandiyankha, Mulungu; tcherani khutu lanu kwa ine, imvani mau anga.

⁷Onetsani chifundo chanu chodabwitsa, Inu wakupulumutsa okhulupirira Inu kwa iwo akuwaukira ndi dzanja lanu lamanja.

⁸Ndisungeni monga kamwana ka m'diso, ndifungatireni mu mthunzi wa mapiko anu,

⁹kundilanditsa kwa oipa amene andipasula, adani a pa moyo wanga amene andizinga.

¹⁰Mafuta ao awatsekereza; m'kamwa mwao alankhula modzikuza.

¹¹Tsopano anatizinga m'mayendedwe athu, apenyetsetsa m'maso kuti atigwetse pansi.

¹²Afanana ndi mkango wofuna kumwetula, ndi msona wa mkango wakukhala mobisalamo.

¹³Ukani Yehova, Mumtsekereze, mumgwetse, landitsani moyo wanga kwa woipa ndi lupanga lanu;

¹⁴kwa anthu, ndi dzanja lanu, Yehova, kwa anthu a dziko lapansi pano amene cholowa chao chili m'moyo uno, ndipo mimba yao muidzaza ndi chuma chanu chobisika; akhuta mtima ndi ana, nasiyira ana amakanda zochuluka zao.

¹⁵Koma ine ndidzapenyerera nkhope yanu m'chilungamo, ndidzakhuta mtima ndi maonekedwe anu, pamene ndidzauka.