Read Chichewa Buku Lopatulika Bible 2014 MASALIMO 18 Bible Online

MASALIMO 18 - Chichewa Buku Lopatulika Bible 2014 bible

MASALIMO 18

¹Kwa Mkulu wa Nyimbo. Salimo la Davide, mtumiki wa Yehova, amene ananena kwa Yehova mau a nyimbo iyi m'mene Yehova anamlanditsa m'dzanja la adani ake onse, ndi m'dzanja la Saulo: ndipo anati, Ndikukondani, Yehova, mphamvu yanga.

²Yehova ndiye thanthwe langa, ndi linga langa, ndi Mpulumutsi wanga; Mulungu wanga, ngaka yanga, ndidzakhulupirira Iye; chikopa changa, nyanga ya chipulumutso changa, msanje wanga.

³Ndidzaitanira Yehova, woyenera kutamandika, ndipo adzandipulumutsa ine kwa adani anga.

⁴Zingwe za imfa zinandizinga, ndipo mitsinje ya zopanda pake inandiopsa.

⁵Zingwe za manda zindizinga, misampha ya imfa inandifikira ine.

⁶M'kusauka kwanga ndinaitana Yehova, ndipo ndinakuwira Mulungu wanga; mau anga anawamva m'Kachisi mwake, ndipo mkuwo wanga wa pankhope pake unalowa m'makutu mwake.

⁷Pamenepo linagwedezeka, ndi kutenthemera dziko lapansi, ndi maziko a mapiri ananjenjemera nagwedezeka, pakuti anakwiya Iyeyo.

⁸Unakwera utsi wotuluka m'mphuno mwake, ndi moto wa m'kamwa mwake unanyeka nuyakitsa makala.

⁹Ndipo Iye anaweramitsa thambo, natsika; ndipo pansi pa mapazi ake panali mdima bii.

¹⁰Ndipo anaberekeka pa kerubi, nauluka; nauluka msanga pa mapiko a mphepo.

¹¹Anaika mdima pobisala pake, hema wake womzinga; mdima wa madzi, makongwa a kuthambo.

¹²Mwa kuchezemira kunali pamaso pake makongwa anakanganuka, matalala ndi makala amoto.

¹³Ndipo anagunda m'mwamba Yehova, ndipo Wam'mwambamwamba anamvetsa liu lake; matalala ndi makala amoto.

¹⁴Ndipo anatuma mivi yake nawabalalitsa; inde mphezi zaunyinji, nawamwaza.

¹⁵Ndipo zidaoneka zoyendamo madzi, nafukuka maziko a dziko lapansi, mwa kudzudzula kwanu, Yehova, mwa mpumo wa mpweya wa m'mphuno mwanu.

¹⁶Anatuma kuchokera m'mwamba, ananditenga; anandivuula m'madzi ambiri.

¹⁷Anandipulumutsa ine kwa mdani wanga wamphamvu, ndi kwa iwo ondida ine, pakuti anandiposa mphamvu.

¹⁸Anandipeza ine tsiku la tsoka langa; koma Yehova anali mchirikizo wanga.

¹⁹Ananditulutsanso andifikitse motakasuka; anandilanditsa, pakuti anakondwera ndi ine.

²⁰Yehova anandibwezera monga mwa chilungamo changa; anandisudzula monga mwa kusisira kwa manja anga.

²¹Pakuti ndasunga njira za Yehova, ndipo sindinachitira choipa kusiyana ndi Mulungu wanga.

²²Pakuti maweruzo ake onse anali pamaso panga, ndipo malemba ake sindinawachotsa kwa ine.

²³Ndipo ndinakhala wangwiro ndi Iye, ndipo ndinadzisunga wosachita choipa changa.

²⁴Ndimo anandisudzulira Yehova monga mwa chilungamo changa, monga mwa kusisira kwa manja anga pamaso pake.

²⁵Pa wachifundo mukhala wachifundo; pa munthu wangwiro mukhala wangwiro.

²⁶Pa woyera mtima mukhala woyera mtima; pa wotsutsatsutsa mukhala wotsutsana naye.

²⁷Pakuti Inu muwapulumutsa anthu aumphawi; koma maso okweza muwatsitsa.

²⁸Pakuti Inu muyatsa nyali yanga; Yehova, Mulungu wanga, aunikira mdima wanga.

²⁹Pakuti mwa Inu ndipyola khamu la anthu; ndipo mwa Mulungu wanga ndilumphira linga.

³⁰Mulungu ndiye wangwiro m'njira zake; mau a Yehova ngoyengeka; ndiye chikopa cha onse okhulupirira Iye.

³¹Pakuti Mulungu ndani wosati Yehova? Ndipo thanthwe ndani wosati Mulungu wathu?

³²Mulungu ndiye wondizingiza mphamvu m'chuuno, nakonza njira yanga ikhale yangwiro.

³³Alinganiza mapazi anga ngati a mbawala, nandiimitsa pamsanje panga.

³⁴Aphunzitsa manja anga agwire nkhondo; kuti walifuka uta wamkuwa ndi manja anga.

³⁵Ndipo mwandipatsa chikopa cha chipulumutso chanu; ndipo dzanja lamanja lanu landigwiriziza, ndipo chifatso chanu chandikuza ine.

³⁶Mwandipondetsa patalipatali, sanaterereka mapazi anga.

³⁷Ndidzalondola adani anga, ndi kuwapeza, ndipo sindidzabwerera asanathe psiti.

³⁸Ndidzawapyoza kuti sangakhoze kuuka, adzagwa pansi pa mapazi anga.

³⁹Pakuti mwandizingiza mphamvu m'chuuno ku nkhondoyo; mwandigonjetsera amene andiukira.

⁴⁰Ndipo adani anga mwawalozetsa m'mbuyo kwa ine, kuti ndipasule ondidawo.

⁴¹Anafuula, koma panalibe wopulumutsa; ngakhale kwa Yehova, koma sanawavomereze.

⁴²Pamenepo ndinawapera ngati fumbi la kumphepo; ndinawakhuthula ngati matope a pabwalo.

⁴³Mwandipulumutsa pa zolimbana nane za anthu; mwandiika mutu wa amitundu; mtundu wa anthu sindinaudziwa udzanditumikira.

⁴⁴Pakumva m'khutu za ine adzandimvera, alendo adzandigonjera monyenga.

⁴⁵Alendo adzafota, nadzatuluka monjenjemera m'ngaka mwao.

⁴⁶Yehova ngwa moyo; ndipo lidalitsike thanthwe langa; nakwezeke Mulungu wa chipulumutso changa.

⁴⁷Ndiye Mulungu amene andibwezerera chilango, nandigonjetsera mitundu ya anthu.

⁴⁸Andipulumutsa kwa adani anga. Inde mundikweza pa iwo akundiukira ine, mundikwatula kwa munthu wachiwawa.

⁴⁹Chifukwa chake Yehova ndidzakuyamikani mwa amitundu, ndipo dzina lanu ndidzaliimbira.

⁵⁰Alanditsa mfumu yake ndi chipulumutso chachikulu; nachitira chifundo wodzozedwa wake, Davide, ndi mbumba yake, kunthawi zonse.