Read Chichewa Buku Lopatulika Bible 2014 MASALIMO 20 Bible Online

MASALIMO 20 - Chichewa Buku Lopatulika Bible 2014 bible

MASALIMO 20

¹Kwa Mkulu wa Nyimbo. Salimo la Davide. Yehova akuvomereze tsiku la nsautso; dzina la Mulungu wa Yakobo likuike pamsanje;

²likutumizire thandizo lotuluka m'malo oyera, ndipo likugwirizize kuchokera m'Ziyoni;

³likumbukire zopereka zako zonse, lilandire nsembe yako yopsereza;

⁴likupatse cha mtima wako, ndipo likwaniritse upo wako wonse.

⁵Tidzafuula mokondwera mwa chipulumutso chanu, ndipo m'dzina la Mulungu wathu tidzakweza mbendera; Yehova akwaniritse mapempho ako onse.

⁶Tsopano ndidziwa kuti Yehova apulumutsa wodzozedwa wake; adzamvomereza m'Mwamba mwake moyera ndi mphamvu ya chipulumutso cha dzanja lake lamanja.

⁷Ena atama magaleta, ndi ena akavalo; koma ife tidzatchula dzina la Yehova Mulungu wathu.

⁸Iwowa anagonjeka, nagwa; koma ife tauka, ndipo takhala chilili.

⁹Yehova, pulumutsani, mfumuyo ativomereze tsiku lakuitana ife.