Read Chichewa Buku Lopatulika Bible 2014 MASALIMO 21 Bible Online

MASALIMO 21 - Chichewa Buku Lopatulika Bible 2014 bible

MASALIMO 21

¹Kwa Mkulu wa Nyimbo. Salimo la Davide. Yehova, adzasekera mfumu mu mphamvu yanu; adzakondwera kwakukulu m'chipulumutso chanu!

²Mwampatsa iye chikhumbo cha mtima wake, ndipo simunakana pempho la milomo yake.

³Pakuti mufika kwa iye ndi madalitso okoma; muika korona wa golide woyengetsa pamutu pake.

⁴Anakupemphani moyo, mwampatsa iye; mwamtalikitsira masiku kunthawi za nthawi.

⁵Ulemerero wake ngwaukulu mwa chipulumutso chanu; mumchitira iye ulemu ndi ukulu.

⁶Pakuti mumuikira madalitso kunthawi zonse; mumkondweretsa ndi chimwemwe pankhope panu.

⁷Pakuti mfumu akhulupirira Yehova, ndipo mwa chifundo cha Wam'mwambamwamba sadzagwedezeka iye.

⁸Dzanja lanu lidzapeza adani anu onse, dzanja lanu lamanja lidzapeza iwo akuda Inu.

⁹Mudzawaika ngati ng'anjo yamoto pa nyengo ya mkwiyo wanu. Yehova adzawatha m'kukwiya kwake, ndipo moto udzawanyeketsa.

¹⁰Mudzaziononga zobala zao kuzichotsa pa dziko lapansi, ndi mbeu zao mwa ana a anthu.

¹¹Pakuti anakupangirani choipa, anapangana chiwembu, osakhoza kuchichita.

¹²Pakuti mudzawabweza m'mbuyo, popiringidza m'nsinga zanu pankhope pao.

¹³Kwezekani, Yehova, mu mphamvu yanu; potero tidzaimba ndi kulemekeza chilimbiko chanu.