Read Chichewa Buku Lopatulika Bible 2014 MASALIMO 22 Bible Online

MASALIMO 22 - Chichewa Buku Lopatulika Bible 2014 bible

MASALIMO 22

¹Kwa Mkulu wa Nyimbo; pa Ajelet Hasakara. Salimo la Davide. Mulungu wanga, Mulungu wanga, mwandisiyiranji ine? Mukhaliranji kutali kwa chipulumutso changa, ndi kwa mau a kubuula kwanga?

²Mulungu wanga, ndiitana usana, koma simuvomereza; ndipo usiku, sindikhala chete.

³Koma Inu ndinu woyera, wakukhala m'malemekezo a Israele.

⁴Makolo athu anakhulupirira Inu; anakhulupirira, ndipo munawalanditsa.

⁵Anafuula kwa Inu, napulumutsidwa; anakhulupirira Inu, ndipo sanachite manyazi.

⁶Koma ine ndine nyongolotsi, si munthu ai, chotonza cha anthu, ndi wonyozedwa ndi anthu.

⁷Onse akundipenya andiseka; akwenzula, apukusa mutu, nati,

⁸Adadzitengera kwa Yehova; kuti adzampulumutsa, amlanditse tsopano popeza akondwera naye.

⁹Pakuti Inu ndinu wondibadwitsa; wondikhulupiritsa pokhala ine pa bere la mai wanga.

¹⁰Chibadwire ine anandisiyira Inu, kuyambira kwa mai wanga Mulungu wanga ndinu.

¹¹Musandikhalire kutali; pakuti nsautso ili pafupi, pakuti palibe mthandizi.

¹²Ng'ombe zamphongo zambiri zandizinga; mphongo zolimba za ku Basani zandizungulira.

¹³Andiyasamira m'kamwa mwao, ngati mkango wozomola ndi wobangula.

¹⁴Ndathiridwa pansi monga madzi, ndipo mafupa anga onse anaguluka. Mtima wanga ukunga sera; wasungunuka m'kati mwa matumbo anga.

¹⁵Mphamvu yanga yauma ngati phale; ndi lilime langa likangamira kunsaya zanga; ndipo mwandifikitsa kufumbi la imfa.

¹⁶Pakuti andizinga agalu, msonkhano wa oipa wanditsekereza; andiboola m'manja anga ndi m'mapazi anga.

¹⁷Ndikhoza kuwerenga mafupa anga onse; iwo ayang'ana nandipenyetsetsa ine.

¹⁸Agawana zovala zanga, nachita maere pa malaya anga.

¹⁹Koma Inu, Yehova, musakhale kutali; mphamvu yanga Inu, mufulumire kundithandiza.

²⁰Landitsani moyo wanga kulupanga; wokondedwa wanga kumphamvu ya galu,

²¹ndipulumutseni m'kamwa mwa mkango; inde mwandiyankha ine ndili pa nyanga za njati.

²²Ndidzalalikira dzina lanu kwa abale anga, pakati pa msonkhano ndidzakulemekezani.

²³Inu akuopa Yehova, mumlemekeze; inu nonse mbumba ya Yakobo, mumchitire ulemu; ndipo muchite mantha ndi Iye, inu nonse mbumba ya Israele.

²⁴Pakuti sanapeputsa ndipo sananyansidwe ndi zunzo la wozunzika; ndipo sanambisire nkhope yake; koma pomfuulira Iye, anamva.

²⁵Lemekezo langa lidzakhala la Inu mu msonkhano waukulu, zowinda zanga ndidzazichita pamaso pa iwo akumuopa Iye.

²⁶Ozunzika adzadya nadzakhuta, adzayamika Yehova iwo amene amfuna, ukhale moyo mtima wako nthawi zonse.

²⁷Malekezero onse a dziko lapansi adzakumbukira nadzatembenukira kwa Yehova, ndipo mafuko onse a amitundu adzagwadira pamaso panu.

²⁸Pakuti ufumuwo ngwa Yehova; Iye achita ufumu mwa amitundu.

²⁹Onenepa onse a pa dziko lapansi adzadya nadzagwadira; onse akutsikira kufumbi adzawerama pamaso pake, ndi iye amene sadziwa kusunga moyo wake.

³⁰Mbumba ya anthu idzamtumikira; kudzanenedwa za Ambuye ku mibadwo yakudza.

³¹Iwo adzadza nadzafotokozera chilungamo chake kwa anthu akadzabadwa, kuti Iye anachichita.