Read Chichewa Buku Lopatulika Bible 2014 MASALIMO 25 Bible Online

MASALIMO 25 - Chichewa Buku Lopatulika Bible 2014 bible

MASALIMO 25

¹Salimo la Davide. Ndikweza moyo wanga kwa Inu, Yehova.

²Mulungu wanga, ndakhulupirira Inu, ndisachite manyazi; adani anga asandiseke ine.

³Inde, onse akuyembekezera Inu sadzachita manyazi; adzachita manyazi iwo amene achita monyenga kopanda chifukwa.

⁴Mundidziwitse njira zanu, Yehova; Mundiphunzitse mayendedwe anu.

⁵Munditsogolere m'choonadi chanu, ndipo mundiphunzitse; pakuti Inu ndinu Mulungu wa chipulumutso changa; Inu ndikuyembekezerani tsiku lonseli.

⁶Kumbukirani, Yehova, nsoni zanu ndi chifundo chanu; pakuti izi nza kale lonse.

⁷Musakumbukire zolakwa za ubwana wanga kapena zopikisana nanu. Mundikumbukire monga mwa chifundo chanu, chifukwa cha ubwino wanu, Yehova.

⁸Yehova ndiye wabwino ndi wolunjika mtima, chifukwa chake adzaphunzitsa olakwa za njira.

⁹Adzawatsogolera ofatsa m'chiweruzo; ndipo adzaphunzitsa ofatsa njira yake.

¹⁰Mayendedwe onse a Yehova ndiwo chifundo ndi choonadi, kwa iwo akusunga pangano lake ndi mboni zake.

¹¹Chifukwa cha dzina lanu, Yehova, ndikhululukireni kusakaza kwanga, pakuti ndiko kwakukulu.

¹²Munthuyo wakuopa Yehova ndani? Adzamlangiza iye njira adzasankheyo.

¹³Moyo wake udzakhala mokoma; ndi mbumba zake zidzalandira dziko lapansi.

¹⁴Chinsinsi cha Yehova chili kwa iwo akumuopa Iye; ndipo adzawadziwitsa pangano lake.

¹⁵Maso anga alinga kwa Yehova kosaleka; pakuti Iye adzaonjola mapazi anga m'ukonde.

¹⁶Cheukirani ine ndipo ndichitireni chifundo; pakuti ndili wounguluma ndi wozunzika.

¹⁷Masautso a mtima wanga akula, munditulutse m'zondipsinja.

¹⁸Penyani mazunzo anga ndi zovuta zanga; ndipo khululukirani zolakwa zanga zonse.

¹⁹Penyani adani anga, popeza achuluka; ndipo andida ndi udani wachiwawa.

²⁰Sungani moyo wanga, ndilanditseni, ndisakhale nao manyazi, pakuti ndakhulupirira Inu.

²¹Ungwiro ndi kuongoka mtima zindisunge, pakuti ndayembekezera Inu.

²²Ombolani Israele, Mulungu, m'masautso ake onse.