Read Chichewa Buku Lopatulika Bible 2014 MASALIMO 28 Bible Online

MASALIMO 28 - Chichewa Buku Lopatulika Bible 2014 bible

MASALIMO 28

¹Salimo la Davide. Kwa Inu, Yehova, ndidzafuulira; thanthwe langa, musandikhalire ngati wosamva; pakuti ngati munditontholera ine, ndidzafanana nao iwo akutsikira kumanda.

²Mverani mau a kupemba kwanga, pamene ndilirira Inu, pamene ndikweza manja anga kuloza ponenera panu poyera.

³Musandikoke kundichotsa pamodzi ndi oipa, ndi ochita zopanda pake; amene alankhula zamtendere ndi anansi ao, koma mumtima mwao muli choipa.

⁴Muwapatse monga mwa ntchito zao, ndi monga mwa choipa chochita iwo; muwapatse monga mwa machitidwe a manja ao; muwabwezere zoyenera iwo.

⁵Pakuti sasamala ntchito za Yehova, kapena machitidwe a manja ake, adzawapasula, osawamanganso.

⁶Wodalitsika Yehova, Pakuti adamva mau a kupemba kwanga.

⁷Yehova ndiye mphamvu yanga, ndi chikopa changa; mtima wanga wakhulupirira Iye, ndipo anandithandiza, chifukwa chake mtima wanga ukondwera kwakukulu; ndipo ndidzamyamika nayo nyimbo yanga.

⁸Yehova ndiye mphamvu yao, inde mphamvu ya chipulumutso cha wodzozedwa wake.

⁹Pulumutsani anthu anu, ndi kudalitsa cholandira chanu; muwawetenso, ndi kuwanyamula nthawi zonse.