Read Chichewa Buku Lopatulika Bible 2014 MASALIMO 31 Bible Online

MASALIMO 31 - Chichewa Buku Lopatulika Bible 2014 bible

MASALIMO 31

¹Kwa Mkulu wa Nyimbo. Salimo la Davide. Ndakhulupirira Inu, Yehova, ndikhale wopanda manyazi nthawi zonse, mwa chilungamo chanu ndipulumutseni ine.

²Munditcherere khutu lanu; ndipulumutseni msanga. Mundikhalire ine thanthwe lolimba, nyumba yamalinga yakundisunga.

³Pakuti Inu ndinu thanthwe langa ndi linga langa; ndipo chifukwa cha dzina lanu ndiyendetseni bwino, ndipo nditsogolereni.

⁴Mundionjole m'ukonde umene ananditchera mobisika. Pakuti Inu ndinu mphamvu yanga.

⁵Ndipereka mzimu wanga m'dzanja lanu; mwandiombola, Inu Yehova, Mulungu wa choonadi.

⁶Ndikwiya nao iwo akusamala zachabe zonama, koma ndikhulupirira Yehova.

⁷Ndidzakondwera ndi kusangalala m'chifundo chanu, pakuti mudapenya zunzo langa; ndipo mudadziwa mzimu wanga mu nsautso yanga.

⁸Ndipo simunandipereka m'dzanja la mdani; munapondetsa mapazi anga pali malo.

⁹Mundichitire chifundo, Yehova, pakuti ndasautsika ine. Diso langa, mzimu wanga, ndi mimba yanga, zapuwala ndi mavuto.

¹⁰Pakuti moyo wanga watha ndi chisoni, ndi zaka zanga zatha ndi kuusa moyo. Mphamvu yanga yafooka chifukwa cha kusakaza kwanga, ndi mafupa anga apuwala.

¹¹Ndakhala chotonza chifukwa cha akundisautsa onse, inde, koposa kwa anansi anga; ndipo anzanga andiyesa choopsa; iwo akundipenya pabwalo anandithawa.

¹²Ndaiwalika m'mtima monga wakufa, ndikhala monga chotengera chosweka.

¹³Pakuti ndamva ugogodi wa ambiri, mantha andizinga. Pondipangira chiwembu, anatsimikiza mtima kulanda moyo wanga.

¹⁴Koma ine ndakhulupirira Inu, Yehova, ndinati, Inu ndinu Mulungu wanga.

¹⁵Nyengo zanga zili m'manja mwanu, mundilanditse m'manja a adani anga, ndi kwa iwo akundilondola ine.

¹⁶Walitsani nkhope yanu pa mtumiki wanu, mundipulumutse ndi chifundo chanu.

¹⁷Yehova, musandichititse manyazi; pakuti ndafuulira kwa Inu, oipa achite manyazi, atonthole m'manda.

¹⁸Ikhale yosalankhula milomo ya mabodza, imene imalankhula mwachipongwe pa olungama mtima, ndi kudzikuza ndi kunyoza.

¹⁹Ha! Kukoma kwanu ndiko kwakukulu nanga, kumene munasungira iwo akuopa Inu, kumene munachitira iwo akukhulupirira Inu, pamaso pa ana a anthu!

²⁰Pobisalira pamaso panu mudzawabisa kwa chiwembu cha munthu, mudzawabisa iwo mumsasa kuti muwalanditse pa kutetana kwa malilime.

²¹Wolemekezeka Yehova, pakuti anandichitira chifundo chake chodabwitsa m'mudzi walinga.

²²Ndipo ine, pakutenga nkhawa, ndinati, Ndadulidwa kundichotsa pamaso panu. Komatu munamva mau a kupemba kwanga pamene ndinafuulira kwa Inu.

²³Kondani Yehova, Inu nonse okondedwa ake, Yehova asunga okhulupirika, ndipo abwezera zochuluka iye wakuchita zodzitama.

²⁴Limbikani ndipo Iye adzalimbitsa mtima wanu, inu nonse akuyembekeza Yehova.