Read Chichewa Buku Lopatulika Bible 2014 MASALIMO 33 Bible Online

MASALIMO 33 - Chichewa Buku Lopatulika Bible 2014 bible

MASALIMO 33

¹Fuulani mokondwera mwa Yehova, inu olungama mtima, oongoka mtima ayenera kulemekeza.

²Yamikani Yehova ndi zeze; muimbireni ndi chisakasa cha zingwe khumi.

³Mumuimbire Iye nyimbo yatsopano; muimbe mwaluso kumveketsa mau.

⁴Pakuti mau a Yehova ali olunjika; ndi ntchito zake zonse zikhulupirika.

⁵Iye ndiye wakukonda chilungamo ndi chiweruzo, dziko lapansi ladzala ndi chifundo cha Yehova.

⁶Zakumwamba zinalengedwa ndi mau a Yehova; ndipo ndi mpweya wa m'kamwa mwake khamu lao lonse.

⁷Amaunjika madzi a m'nyanja monga mulu, amakundika zakuya mosungiramo.

⁸Dziko lonse lapansi liope Yehova, ponse pali anthu achite mantha chifukwa cha Iye.

⁹Pakuti ananena, ndipo chinachitidwa; analamulira, ndipo chinakhazikika.

¹⁰Yehova aphwanya upo wa amitundu, asandutsa chabe zolingirira za mitundu ya anthu.

¹¹Chiweruzo cha Yehova chikhazikika chikhazikikire, zolingirira za m'mtima mwake ku mibadwomibadwo.

¹²Wodalitsika mtundu wa anthu umene Yehova ndiye Mulungu wao; mtundu womwe anausankha ukhale cholandira cha Iye yekha.

¹³Yehova apenyerera m'mwamba; aona ana onse a anthu.

¹⁴M'malo akhalamo Iye, amapenya pansi pa onse akukhala m'dziko lapansi.

¹⁵Iye amene akonza mitima ya iwo onse, amene azindikira zochita zao zonse.

¹⁶Palibe mfumu yoti gulu lalikulu limpulumutsa, mphamvu yaikulu siichilanditsa chiphona.

¹⁷Kavalo safikana kupulumuka naye, chinkana mphamvu yake njaikulu sapulumutsa.

¹⁸Taonani, diso la Yehova lili pa iwo akumuopa Iye, pa iwo akuyembekeza chifundo chake.

¹⁹Kupulumutsa moyo wao kwa imfa, ndi kuwasunga ndi moyo m'nyengo ya njala.

²⁰Moyo wathu walindira Yehova; Iye ndiye thandizo lathu ndi chikopa chathu.

²¹Pakuti mtima wathu udzakondwera mwa Iye, chifukwa takhulupirira dzina lake loyera.

²²Yehova, chifundo chanu chikhale pa ife, monga takuyembekezani Inu.