Read Chichewa Buku Lopatulika Bible 2014 MASALIMO 34 Bible Online

MASALIMO 34 - Chichewa Buku Lopatulika Bible 2014 bible

MASALIMO 34

¹Salimo la Davide. Muja anasintha makhalidwe ake pamaso pa Abimeleki, amene anampirikitsa, ndipo anachoka. Ndidzalemekeza Yehova nyengo zonse; kumlemekeza kwake kudzakhala m'kamwa mwanga kosalekeza.

²Moyo wanga udzatamanda Yehova; ofatsa adzakumva nadzakondwera.

³Bukitsani pamodzi ndine ukulu wa Yehova, ndipo tikweze dzina lake pamodzi.

⁴Ndinafuna Yehova ndipo anandivomera, nandilanditsa m'mantha anga onse.

⁵Iwo anayang'ana Iye nasanguluka; ndipo pankhope pao sipadzachita manyazi.

⁶Munthu uyu wozunzika anafuula, ndipo Yehova anamumva, nampulumutsa m'masautso ake onse.

⁷ Mngelo wa Yehova azinga kuwatchinjiriza iwo akuopa Iye, nawalanditsa iwo.

⁸Talawani, ndipo onani kuti Yehova ndiye wabwino; wodala munthuyo wakukhulupirira Iye.

⁹Opani Yehova, inu oyera mtima ake; chifukwa iwo akumuopa Iye sasowa.

¹⁰Misona ya mkango isowa nimva njala, koma iwo akufuna Yehova sadzasowa kanthu kabwino.

¹¹Idzani ananu ndimvereni ine, ndidzakulangizani zakumuopa Yehova.

¹²Munthu wokhumba moyo ndani, wokonda masiku, kuti aone zabwino?

¹³Uletse lilime lako lisatchule zoipa, ndipo milomo yako isalankhule chinyengo.

¹⁴Futuka pazoipa, nuchite zabwino, funa mtendere ndi kuulondola.

¹⁵Maso a Yehova ali pa olungama mtima, ndipo makutu ake atchereza kulira kwao.

¹⁶Nkhope ya Yehova itsutsana nao akuchita zoipa, kudula chikumbukiro chao pa dziko lapansi.

¹⁷Iwowo anaitana, ndipo Yehova anawamva, nawalanditsa kumasautso ao onse.

¹⁸Yehova ali pafupi ndi iwo a mtima wosweka, apulumutsa iwo a mzimu wolapadi.

¹⁹Masautso a wolungama mtima achuluka, koma Yehova amlanditsa mwa onsewa.

²⁰Iye asunga mafupa ake onse; silinathyoka limodzi lonse.

²¹Mphulupulu idzamupha woipa; ndipo adzawatsutsa kumlandu iwo akudana naye wolungama.

²²Yehova aombola moyo wa anyamata ake, ndipo sadzawatsutsa kumlandu onse akukhulupirira Iye.