Read Chichewa Buku Lopatulika Bible 2014 MASALIMO 37 Bible Online

MASALIMO 37 - Chichewa Buku Lopatulika Bible 2014 bible

MASALIMO 37

¹Salimo la Davide. Usavutike mtima chifukwa cha ochita zoipa, usachite nsanje chifukwa cha ochita chosalungama.

²Pakuti adzawamweta msanga monga udzu, ndipo adzafota monga msipu wauwisi.

³Khulupirira Yehova, ndipo chita chokoma; khala m'dziko, ndipo tsata choonadi.

⁴Udzikondweretsenso mwa Yehova; ndipo Iye adzakupatsa zokhumba mtima wako.

⁵Pereka njira yako kwa Yehova; khulupiriranso Iye, adzachichita.

⁶Ndipo adzaonetsa chilungamo chako monga kuunika, ndi kuweruza kwako monga usana.

⁷Khala chete mwa Yehova, numlindirire Iye; usavutike mtima chifukwa cha iye wolemerera m'njira yake, chifukwa cha munthu wakuchita chiwembu.

⁸Leka kupsa mtima, nutaye mkwiyo; usavutike mtima ungachite choipa.

⁹Pakuti ochita zoipa adzadulidwa; koma iwo akuyembekeza Yehova, iwowa adzalandira dziko lapansi.

¹⁰Katsala kanthawi ndipo woipa adzatha psiti; inde, udzayang'anira mbuto yake, nudzapeza palibe.

¹¹Koma ofatsa adzalandira dziko lapansi; nadzakondwera nao mtendere wochuluka.

¹²Woipa apangira chiwembu wolungama, namkukutira mano.

¹³Ambuye adzamseka, popeza apenya kuti tsiku lake likudza.

¹⁴Oipa anasolola lupanga, nakoka uta wao; alikhe ozunzika ndi aumphawi, aphe amene ali oongoka m'njira.

¹⁵Lupanga lao lidzalowa m'mtima mwao momwe, ndipo mauta ao adzathyoledwa.

¹⁶Zochepa zake za wolungama zikoma koposa kuchuluka kwao kwa oipa ambiri.

¹⁷Pakuti manja a oipa adzathyoledwa, koma Yehova achirikiza olungama.

¹⁸Yehova adziwa masiku a anthu angwiro; ndipo chosiyira chao chidzakhala chosatha.

¹⁹Sadzachita manyazi m'nyengo yoipa, ndipo m'masiku a njala adzakhuta.

²⁰Pakuti oipa adzatayika, ndipo adani ake a Yehova adzanga mafuta a anaankhosa; adzanyeka, monga utsi adzakanganuka.

²¹Woipa akongola, wosabweza, koma wolungama achitira chifundo, napereka.

²²Pakuti iwo amene awadalitsa adzalandira dziko lapansi; koma iwo amene awatemberera adzadulidwa.

²³Yehova akhazikitsa mayendedwe a munthu; ndipo akondwera nayo njira yake.

²⁴Angakhale akagwa, satayikiratu, pakuti Yehova agwira dzanja lake.

²⁵Ndinali mwana ndipo ndakalamba; ndipo sindinapenya wolungama wasiyidwa, kapena mbumba zake zilinkupempha chakudya.

²⁶Tsiku lonse achitira chifundo, nakongoletsa; ndipo mbumba zake zidalitsidwa.

²⁷Siyana nacho choipa, nuchite chokoma, nukhale nthawi zonse.

²⁸Pakuti Yehova akonda chiweruzo, ndipo sataya okondedwa ake. Asungika kosatha, koma adzadula mbumba za oipa.

²⁹Olungama adzalandira dziko lapansi, nadzakhala momwemo kosatha.

³⁰Pakamwa pa wolungama palankhula zanzeru, ndi lilime lake linena chiweruzo.

³¹Malamulo a Mulungu wake ali mumtima mwake; pakuyenda pake sadzaterereka.

³²Woipa aunguza wolungama, nafuna kumupha.

³³Yehova sadzamsiya m'dzanja lake; ndipo sadzamtsutsa poweruzidwa iye.

³⁴Yembekeza Yehova, nusunge njira yake, ndipo Iye adzakukweza kuti ulandire dziko. Pakudulidwa oipa udzapenya.

³⁵Ndapenya woipa, alikuopsa, natasa monga mtengo wauwisi wanzika.

³⁶Koma anapita ndipo taona, kwati zii; ndipo ndinampwaira osampeza.

³⁷Tapenya wangwiro, ndipo taona woongoka mtima! Pakuti ku matsiriziro ake a munthuyo kuli mtendere.

³⁸Koma olakwa adzaonongeka pamodzi; matsiriziro a oipa adzadulidwa.

³⁹Koma chipulumutso cha olungama chidzera kwa Yehova, Iye ndiye mphamvu yao m'nyengo ya nsautso.

⁴⁰Ndipo Yehova awathandiza, nawalanditsa; awalanditsa kwa oipa nawapulumutsa, chifukwa kuti anamkhulupirira Iye.