Read Chichewa Buku Lopatulika Bible 2014 MASALIMO 38 Bible Online

MASALIMO 38 - Chichewa Buku Lopatulika Bible 2014 bible

MASALIMO 38

¹Salimo la Davide, lakukumbutsa. Yehova, musandidzudzule ndi mkwiyo wanu, ndipo musandilange moopsa m'mtima mwanu.

²Pakuti mivi yanu yandilowa, ndi dzanja lanu landigwera.

³Mumnofu mwanga mulibe chamoyo chifukwa cha ukali wanu; ndipo m'mafupa anga simuzizira, chifukwa cha cholakwa changa.

⁴Pakuti mphulupulu zanga zapitirira pamutu panga; ndathodwa nazo monga ndi katundu wolemera.

⁵Mabala anga anunkha, adaola, chifukwa cha kupusa kwanga.

⁶Ndapindika, ndawerama kwakukulu; ndimayenda woliralira tsiku lonse.

⁷Pakuti m'chuuno mwanga mutentha kwambiri; palibe pamoyo m'mnofu mwanga.

⁸Ndafooka ine, ndipo ndachinjizidwa, ndabangula chifukwa cha kumyuka mtima wanga.

⁹Ambuye, chikhumbo changa chonse chili pamaso panu; ndipo kubuula kwanga sikubisika kwa Inu.

¹⁰Mtima wanga ugundagunda, mphamvu yanga yachoka, ndipo kuunika kwa maso anga, ndi iko komwe kwandichokera.

¹¹Ondikonda ndi anzanga apewa mliri wanga; ndipo anansi anga aima patali.

¹²Ndipo anditchera misampha iwo akufuna moyo wanga; ndipo iwo akuyesa kundichitira choipa alankhula zoononga, nalingirira zonyenga tsiku lonse.

¹³Koma ine, monga gonthi, sindimva; ndipo monga munthu wosalankhula, sinditsegula pakamwa panga.

¹⁴Inde ndikunga munthu wosamva, ndipo m'kamwa mwanga mulibe makani.

¹⁵Pakuti ndikuyembekezani Inu, Yehova; Inu mudzayankha, Ambuye Mulungu wanga.

¹⁶Pakuti ndinati, Asakondwerere ine; pakuterereka phazi langa, asadzikuze pa ine.

¹⁷Ndafikana potsimphina, ndipo chisoni changa chili pamaso panga chikhalire.

¹⁸Pakuti ndidzafotokozera mphulupulu yanga; nditenga nkhawa chifukwa cha tchimo langa.

¹⁹Koma adani anga ali ndi moyo, nakhala ndi mphamvu, ndipo akundida kopanda chifukwa achuluka.

²⁰Ndipo iwo akubwezera choipa pa chabwino atsutsana nane, popeza nditsata chabwino.

²¹Musanditaye, Yehova, Mulungu wanga, musakhale kutali ndi ine.

²²Fulumirani kundithandiza, Ambuye, chipulumutso changa.