Read Chichewa Buku Lopatulika Bible 2014 MASALIMO 39 Bible Online

MASALIMO 39 - Chichewa Buku Lopatulika Bible 2014 bible

MASALIMO 39

¹Kwa Mkulu wa Nyimbo, kwa Yedutuni. Salimo la Davide. Ndinati, Ndidzasunga njira zanga, kuti ndingachimwe ndi lilime langa. Ndidzasunga pakamwa panga ndi cham'kamwa, pokhala woipa ali pamaso panga.

²Ndinatonthola osanena mau, ndinakhala chete osalawa chokoma; ndipo chisoni changa chinabuka.

³Mtima wanga unatentha m'kati mwa ine; unayaka moto pakulingirira ine. Pamenepo ndinalankhula ndi lilime langa,

⁴Yehova, mundidziwitse chimaliziro changa, ndi mawerengedwe a masiku anga ndi angati; ndidziwe malekezero anga.

⁵Onani, munaika masiku anga akhale monga kuyesa dzanja; ndipo zaka zanga zili ngati chabe pamaso panu, Indedi munthu aliyense angakhale wokhazikika, ali chabe konse.

⁶Indedi munthu ayenda ngati mthunzi; Indedi avutika chabe: Asonkhanitsa chuma, ndipo sadziwa adzachilandira ndani?

⁷Ndipo tsopano, Ambuye, ndilindira chiyani? Chiyembekezo changa chili pa Inu.

⁸Ndipulumutseni kwa zolakwa zanga zonse, musandiike ndikhale chotonza cha wopusa.

⁹Ndinakhala duu, sindinatsegula pakamwa panga; chifukwa inu mudachichita.

¹⁰Mundichotsere chovutitsa chanu; pandithera ine chifukwa cha kulanga kwa dzanja lanu.

¹¹Pamene mulanga munthu ndi zomdzudzula chifukwa cha mphulupulu, mukanganula kukongola kwake monga mumachita ndi njenjete. Indedi, munthu aliyense ali chabe.

¹²Imvani pemphero langa, Yehova, ndipo tcherani khutu kulira kwanga; musakhale chete pa misozi yanga; Pakuti ine ndine mlendo ndi Inu, wosakhazikika, monga makolo anga onse.

¹³Ndiloleni, kuti nditsitsimuke, ndisanamuke ndi kukhala kuli zii.