Read Chichewa Buku Lopatulika Bible 2014 MASALIMO 44 Bible Online

MASALIMO 44 - Chichewa Buku Lopatulika Bible 2014 bible

MASALIMO 44

¹Kwa Mkulu wa Nyimbo. Chilangizo cha kwa ana a Kora. Mulungu, tidamva m'makutu mwathu, makolo athu anatisimbira, za ntchitoyo mudaichita masiku ao, masiku akale.

²Inu munapirikitsa amitundu ndi dzanja lanu, koma iwowa munawaoka; munasautsa mitundu ya anthu, ndipo munawaingitsa.

³Pakuti sanalande dziko ndi lupanga lao, ndipo mkono wao sunawapulumutse. Koma dzanja lanu lamanja, ndi mkono wanu, ndi kuunika kwa nkhope yanu. Popeza munakondwera nao,

⁴Inu ndinu mfumu yanga, Mulungu; lamulirani chipulumutso cha Yakobo.

⁵Mwa Inu tidzakankhira pansi otsutsana nafe, m'dzina lanu tidzapondereza akutiukira ife.

⁶Pakuti sinditama uta wanga, ndipo lupanga langa silingandipulumutse.

⁷Koma Inu munatipulumutsa kwa iwo akutsutsana nafe, ndipo akudana nafe, mudawachititsa manyazi.

⁸Mwa Mulungu tidzitamanda tsiku lonse, ndipo dzina lanu tidzaliyamika kosatha.

⁹Koma mwatitaya, ndi kutinyazitsa; ndipo simutuluka nao makamu a nkhondo athu.

¹⁰Mutibwereretsa kuthawa otisautsa, ndipo akudana nafe adzifunkhira okha.

¹¹Mwatipereka ngati nkhosa zoyenera kuzidya; ndipo mwatibalalitsa mwa amitundu.

¹²Mugulitsa anthu anu kwachabe, ndipo mtengo wake simupindula nao.

¹³Mutisandutsa chotonza kwa anzathu, ndi choseketsa ndi cholalatitsa iwo akutizinga.

¹⁴Mutiika tikhale onyozeka mwa amitundu, ndi kuti anthu atipukusire mitu.

¹⁵Tsiku lonse chimpepulo changa chikhala pamaso panga, ndipo manyazi a pankhope panga andikuta.

¹⁶Chifukwa cha mau a wotonza wochitira mwano; chifukwa cha mdani ndi wobwezera chilango.

¹⁷Zonsezi zatigwera; koma sitinakuiwalani, ndipo sitinachita monyenga m'pangano lanu.

¹⁸Mtima wathu sunabwerera m'mbuyo, ndipo m'mayendedwe athu sitinapatuka m'njira yanu;

¹⁹mungakhale munatithyola mokhala zilombo, ndi kutiphimba nao mthunzi wa imfa.

²⁰Tikadaiwala dzina la Mulungu wathu, ndi kutambasulira manja athu kwa mulungu wachilendo;

²¹Mulungu sakadasanthula ichi kodi? Pakuti adziwa zinsinsi za mtima.

²²Koma, chifukwa cha Inu, tiphedwa tsiku lonse; tiyesedwa ngati nkhosa zakuzipha.

²³Galamukani, mugoneranji, Ambuye? Ukani, musatitaye chitayire.

²⁴Mubisiranji nkhope yanu, ndi kuiwala kuzunzika ndi kupsinjika kwathu?

²⁵Pakuti moyo wathu waweramira kufumbi, pamimba pathu pakangamira dziko lapansi.

²⁶Ukani, tithandizeni, tiomboleni mwa chifundo chanu.