Read Chichewa Buku Lopatulika Bible 2014 MASALIMO 46 Bible Online

MASALIMO 46 - Chichewa Buku Lopatulika Bible 2014 bible

MASALIMO 46

¹Kwa Mkulu wa Nyimbo; Chilangizo cha kwa ana a Kora. Pa Alamot. Nyimbo. Mulungu ndiye pothawirapo pathu ndi mphamvu yathu, thandizo lopezekeratu m'masautso.

²Chifukwa chake sitidzachita mantha, lingakhale lisandulika dziko lapansi, angakhale mapiri asunthika, nakhala m'kati mwa nyanja.

³Chinkana madzi ake akokoma, nachita thovu, nagwedezeka mapiri ndi kudzala kwake.

⁴Pali mtsinje, ngalande zake zidzakondweretsa mudzi wa Mulungu. Malo oyera okhalamo Wam'mwambamwamba.

⁵Mulungu ali m'kati mwake, sudzasunthika, Mulungu adzauthandiza mbandakucha.

⁶ Amitundu anapokosera, maufumu anagwedezeka, ananena mau, dziko lapansi linasungunuka.

⁷Yehova wa makamu ali ndi ife; Mulungu wa Yakobo ndiye pamsanje pathu.

⁸Idzani, penyani ntchito za Yehova, amene achita zopululutsa pa dziko lapansi.

⁹Aletsa nkhondo ku malekezero a dziko lapansi; athyola uta, nadula nthungo; atentha magaleta ndi moto.

¹⁰Khalani chete, ndipo dziwani kuti Ine ndine Mulungu, Ndidzabuka mwa amitundu, ndidzabuka pa dziko lapansi.

¹¹Yehova wa makamu ali ndi ife, Mulungu wa Yakobo ndiye pamsanje pathu.