Read Chichewa Buku Lopatulika Bible 2014 MASALIMO 48 Bible Online

MASALIMO 48 - Chichewa Buku Lopatulika Bible 2014 bible

MASALIMO 48

¹Nyimbo; Salimo la ana a Kora. Yehova ndiye wamkulu, ayenera kulemekezekadi, m'mudzi wa Mulungu wathu, m'phiri lake loyera.

²Phiri la Ziyoni, chikhalidwe chake nchokoma kumbali zake za kumpoto, ndilo chimwemwe cha dziko lonse lapansi, mudzi wa mfumu yaikulu.

³Mulungu adziwika m'zinyumba zake ngati msanje.

⁴Pakuti, taonani, mafumuwo anasonkhana, anapitira pamodzi.

⁵Anapenya mudziwo, ndipo pamenepo anadabwa; anaopsedwa, nathawako.

⁶Pomwepo anagwidwa nako kunthunthumira; anamva chowawa, ngati wam'chikuta.

⁷Muswa zombo za ku Tarisisi ndi mphepo ya kum'mawa.

⁸Monga tidamva, momwemo tidapenya m'mudzi wa Yehova wa makamu, m'mudzi wa Mulungu wathu, Mulungu adzaukhazikitsa kunthawi yamuyaya.

⁹Tidalingalira zachifundo chanu, Mulungu, m'kati mwa Kachisi wanu.

¹⁰Monga dzina lanu, Mulungu, momwemo lemekezo lanu ku malekezero a dziko lapansi; m'dzanja lamanja lanu mudzala chilungamo.

¹¹Likondwere phiri la Ziyoni, asekere ana akazi a Yuda, chifukwa cha maweruzo anu.

¹²Zungulirani Ziyoni, ndipo muuzinge, werengani nsanja zake.

¹³Penyetsetsani malinga ake, yesetsani zinyumba zake; kuti mukaziwerengere mibadwo ikudza m'mbuyo.

¹⁴Pakuti Mulungu ameneyo ndiye Mulungu wathu kunthawi za nthawi, adzatitsogolera kufikira imfa.