Read Chichewa Buku Lopatulika Bible 2014 MASALIMO 49 Bible Online

MASALIMO 49 - Chichewa Buku Lopatulika Bible 2014 bible

MASALIMO 49

¹Kwa Mkulu wa Nyimbo; Salimo la ana a Kora. Dzamveni kuno, anthu inu nonse; tcherani khutu, inu nonse amakono,

²awamba ndi omveka omwe, achuma ndi aumphawi omwe.

³Pakamwa panga padzanena zanzeru; ndipo chilingiriro cha mtima wanga chidzakhala cha chidziwitso.

⁴Ndidzatchera khutu kufanizo, ndidzafotokozera chophiphiritsa changa poimbira.

⁵Ndidzaoperanji masiku oipa, pondizinga amphulupulu onditsata kuchidendene?

⁶Iwo akutama kulemera kwao; nadzitamandira pa kuchuluka kwa chuma chao;

⁷kuombola mbale sangadzamuombole, kapena kumperekera dipo kwa Mulungu.

⁸Popeza chiombolo cha moyo wao ncha mtengo wake wapatali, ndipo chilekeke nthawi zonse.

⁹Kuti akhale ndi moyo osafa, osaona chivundi.

¹⁰Pakuti aona anzeru amafa, monga aonongekera wopusa, wodyerera momwemo, nasiyira ena chuma chao.

¹¹Mumtima mwao ayesa kuti nyumba zao zikhala chikhalire, ndi mokhala iwo ku mibadwomibadwo; atchapo dzina lao padziko pao.

¹²Koma munthu wa ulemu wake sakhalitsa, afanana ndi nyama za kuthengo, afanana nazo.

¹³Njira yao yino ndiyo kupusa kwao, koma akudza m'mbuyo avomereza mau ao.

¹⁴Aikidwa m'manda ngati nkhosa; mbusa wao ndi imfa. Ndipo m'mawa mwake oongoka mtima adzakhala mafumu ao; ndipo maonekedwe ao adzanyekera kumanda, kuti pokhala pake padzasowa.

¹⁵Koma Mulungu adzaombola moyo wanga kumphamvu ya manda. Pakuti adzandilandira ine.

¹⁶Usaope polemezedwa munthu, pochuluka ulemu wa nyumba yake;

¹⁷pakuti pomwalira iye sadzamuka nako kanthu kalikonse; ulemu wake sutsika naye kumtsata m'mbuyo.

¹⁸Angakhale anadalitsa moyo wake pokhala ndi moyo, ndipo anthu akulemekeza iwe, podzichitira wekha zokoma.

¹⁹Adzamuka kumbadwo wa makolo ake; sadzaona kuunika nthawi zonse.

²⁰Munthu waulemu, koma wosadziwitsa, afanana ndi nyama za kuthengo, afanana nazo.