Read Chichewa Buku Lopatulika Bible 2014 MASALIMO 50 Bible Online

MASALIMO 50 - Chichewa Buku Lopatulika Bible 2014 bible

MASALIMO 50

¹Salimo la Asafu. Mulungu wa milungu, Yehova, wanena, aitana dziko lapansi kuyambira kutuluka kwa dzuwa kufikira kulowa kwake.

²Mulungu awalira m'Ziyoni, mokongola mwangwiro.

³Adzafika Mulungu wathu, ndipo sadzakhala chete. Moto udzanyeka pankhope pake, ndipo pozungulira pake padzasokosera kwakukulu.

⁴Kumwamba adzaitana zakumwamba, ndi dziko lapansi, kuti aweruze anthu ake.

⁵Mundisonkhanitsire okondedwa anga; amene anapangana ndi Ine ndi nsembe.

⁶Ndipo zakumwamba zionetsera chilungamo chake; pakuti Mulungu mwini wake ndiye woweruza.

⁷Imvani, anthu anga, ndipo ndidzanena; Israele, ndipo ndidzachita mboni pa iwe, Ine Mulungu, ndine Mulungu wako.

⁸Sindikudzudzula iwe chifukwa cha nsembe zako; popeza nsembe zako zopsereza zili pamaso panga chikhalire.

⁹Sindidzatenga ng'ombe m'nyumba mwako, kapena mbuzi m'makola mwako.

¹⁰Pakuti zamoyo zonse za kuthengo ndi zanga, ndi ng'ombe za pa mapiri zikwi.

¹¹Ndidziwa mbalame zonse za m'mapiri, ndipo nyama za kuthengo zili ndi Ine.

¹²Ndikamva njala, sindidzakuuza, pakuti dziko lonse ndi langa, ndi kudzala kwake komwe.

¹³Kodi ndidzadya nyama ya ng'ombe, kapena kumwa mwazi wa mbuzi?

¹⁴Pereka kwa Mulungu nsembe yachiyamiko; numchitire Wam'mwambamwamba chowinda chako.

¹⁵Ndipo undiitane tsiku la chisautso, ndidzakulanditsa, ndipo iwe udzandilemekeza.

¹⁶Koma kwa woipa Mulungu anena, Uli nao chiyani malemba anga kulalikira, ndi kutchula pangano langa pakamwa pako?

¹⁷Popeza udana nacho chilangizo, nufulatira mau anga.

¹⁸Pakuona mbala, uvomerezana nayo, nuchita nao achigololo.

¹⁹Pakamwa pako mpochita zochimwa, ndipo lilime lako likonza chinyengo.

²⁰Ukhala, nuneneza mbale wako; usinjirira mwana wa mai wako.

²¹Izi unazichita iwe, ndipo ndinakhala chete Ine; unayesa kuti ndifanana nawe, ndidzakudzudzula, ndi kuchilongosola pamaso pako.

²²Dziwitsani ichi inu oiwala Mulungu, kuti ndingakumwetuleni, ndipo mungasowepo mpulumutsi.

²³Wopereka nsembe yachiyamiko andilemekeza Ine; ndipo kwa iye wosunga mayendedwe ake ndidzamuonetsa chipulumutso cha Mulungu.