Read Chichewa Buku Lopatulika Bible 2014 MASALIMO 51 Bible Online

MASALIMO 51 - Chichewa Buku Lopatulika Bible 2014 bible

MASALIMO 51

¹Kwa Mkulu wa Nyimbo. Salimo la Davide; m'mene anamdzera Natani mneneriyo atalowa iye kwa Bateseba. Mundichitire ine chifundo, Mulungu, monga mwa kukoma mtima kwanu; monga mwa unyinji wa nsoni zokoma zanu mufafanize machimo anga.

²Mubwereze kunditsuka mphulupulu yanga, ndipo mundiyeretse kundichotsera choipa changa.

³Chifukwa ndazindikira machimo anga; ndipo choipa changa chili pamaso panga chikhalire.

⁴Pa Inu, Inu nokha, ndinachimwa, ndipo ndinachichita choipacho pamaso panu; kuti mukhale wolungama pakulankhula Inu, mukhalenso woyera pa kuweruza kwanu.

⁵Onani, ndinabadwa m'mphulupulu, ndipo mai wanga anandilandira m'zoipa.

⁶Onani, Inu mukondwera ndi zoonadi m'malo a m'katimo; ndipo m'malo a m'tseri mudzandidziwitsa nzeru.

⁷Mundiyeretse ndi hisope ndipo ndidzayera; munditsuke ndipo ndidzakhala wa mbu woposa matalala.

⁸Mundimvetse chimwemwe ndi kusekera, kuti mafupawo munawathyola akondwere.

⁹Muzibisire nkhope yanu zolakwa zanga, ndipo mufafanize mphulupulu zanga zonse.

¹⁰Mundilengere mtima woyera, Mulungu; mukonze mzimu wokhazikika m'kati mwanga.

¹¹Musanditaye kundichotsa pamaso panu; musandichotsere Mzimu wanu Woyera.

¹²Mundibwezere chimwemwe cha chipulumutso chanu; ndipo mzimu wakulola undigwirizize.

¹³Pomwepo ndidzalangiza ochimwa njira zanu; ndipo olakwa adzabwera kwa Inu.

¹⁴Mundilanditse kumlandu wa mwazi, Mulungu, ndinu Mulungu wa chipulumutso changa; lilime langa lidzakweza nyimbo ya chilungamo chanu.

¹⁵Ambuye, tsegulani pa milomo yanga; ndipo pakamwa panga padzalalikira ulemekezo wanu.

¹⁶Pakuti simukondwera ndi nsembe, mwenzi nditapereka; nsembe yopsereza simuikonda.

¹⁷Nsembe za Mulungu ndizo mzimu wosweka; Inu, Mulungu, simudzaupeputsa mtima wosweka ndi wolapa.

¹⁸Chitirani Ziyoni chokoma monga mwa kukondwera kwanu; mumange malinga a miyala a Yerusalemu.

¹⁹Pamenepo mudzakondwera nazo nsembe zachilungamo, ndi nsembe yopsereza ndi yopsereza yathunthu; pamenepo adzapereka ng'ombe pa guwa lanu la nsembe.