Read Chichewa Buku Lopatulika Bible 2014 MASALIMO 52 Bible Online

MASALIMO 52 - Chichewa Buku Lopatulika Bible 2014 bible

MASALIMO 52

¹Kwa Mkulu wa Nyimbo; Chilangizo cha Davide. Muja analowa Doegi Mwedomu nauza Saulo nati kwa iye, Davide walowa m'nyumba ya Ahimeleki. Udzitamandiranji ndi choipa, chiphona iwe? Chifundo cha Mulungu chikhala tsiku lonse.

²Lilime lako likupanga zoipa; likunga lumo lakuthwa, lakuchita monyenga.

³Ukonda choipa koposa chokoma; ndi bodza koposa kunena chilungamo,

⁴ukonda mau onse akuononga, lilime lachinyengo, iwe.

⁵Potero Mulungu adzakupasula kunthawi zonse, adzakuchotsa nadzakukwatula m'hema mwako, nadzakuzula, kukuchotsa m'dziko la amoyo.

⁶Ndipo olungama adzachiona, nadzaopa, nadzamseka, ndi kuti,

⁷Tapenyani, suyu munthuyu amene sanamuyese Mulungu mphamvu yake; amene anatama kuchuluka kwa chuma chake, nadzilimbitsa m'kuipsa kwake.

⁸Koma ine ndine ngati mtengo wauwisi wa azitona m'nyumba ya Mulungu. Ndikhulupirira chifundo cha Mulungu kunthawi za nthawi.

⁹Ndidzakuyamikani kosatha, popeza Inu munachichita ichi, ndipo ndidzayembekeza dzina lanu, pakuti ichi nchokoma, pamaso pa okondedwa anu.