Read Chichewa Buku Lopatulika Bible 2014 MASALIMO 55 Bible Online

MASALIMO 55 - Chichewa Buku Lopatulika Bible 2014 bible

MASALIMO 55

¹Kwa Mkulu wa Nyimbo; pa Zirumbu. Chilangizo cha Davide. Tcherani khutu pemphero langa, Mulungu; ndipo musadzibisa pa kupemba kwanga.

²Mverani, ndipo mundiyankhe, ndiliralira m'kudandaula kwanga ndi kubuula;

³chifukwa cha mau a mdani, chifukwa cha kundipsinja woipa; pakuti andisenza zopanda pake, ndipo adana nane mumkwiyo.

⁴Mtima wanga uwawa m'kati mwanga; ndipo zoopsa za imfa zandigwera.

⁵Mantha ndi kunjenjemera zandidzera, ndipo zoopsetsa zandikuta.

⁶Ndipo ndinati, Ha, wina akadandipatsa mapiko onga a njiwa! Mwenzi nditauluka, ndi kukhaliratu.

⁷Onani, ndikadathawira kutali, ndikadagona m'chipululu.

⁸Ndikadafulumira ndipulumuke kumphepo yolimba ndi namondwe.

⁹Aonongeni, Ambuye, gawani lilime lao, pakuti ndaona chiwawa ndi ndeu m'mudzimo.

¹⁰Izizo ziuzungulira pa malinga ake usana ndi usiku; ndipo m'kati mwake muli zopanda pake ndi chovuta.

¹¹M'kati mwake muli kusakaza, chiwawa ndi chinyengo sizichoka m'makwalala ake.

¹²Pakuti si mdani amene ananditonzayo; pakadatero ndikadachilola, amene anadzikuza pa ine sindiye munthu wondida; pakadatero ndikadambisalira:

¹³Koma ameneyo ndiwe, munthu woyenerana nane, tsamwali wanga, wodziwana nane.

¹⁴Tinapangirana upo wokoma, tinaperekeza khamu la anthu popita kunyumba ya Mulungu.

¹⁵Imfa iwagwere modzidzimutsa, atsikire kumanda ali amoyo, pakuti m'mokhala mwao muli zoipa pakati pao.

¹⁶Koma ine ndidzafuulira kwa Mulungu; ndipo Yehova adzandipulumutsa.

¹⁷Madzulo, m'mawa, ndi msana ndidzadandaula, ndi kubuula, ndipo adzamva mau anga.

¹⁸Anaombola moyo wanga kunkhondo yondilaka, ndikhale mumtendere, pakuti ndiwo ambiri okangana nane.

¹⁹Mulungu adzamva, nadzawasautsa, ndiye wokhalabe chiyambire kale lomwe. Popeza iwowa sasinthika konse, ndipo saopa Mulungu.

²⁰Anatulutsa manja ake awagwire iwo akuyanjana naye, anaipsa pangano lake.

²¹Pakamwa pake mposalala ngati mafuta amkaka, koma mumtima mwake munali nkhondo, mau ake ngofewa ngati mafuta oyenga, koma anali malupanga osololasolola.

²²Umsenze Yehova nkhawa zako, ndipo Iye adzakugwiriziza, nthawi zonse sadzalola wolungama agwedezeke.

²³Koma Inu, Mulungu, mudzawatsitsira kudzenje la chionongeko. Anthu okhetsa mwazi ndi achinyengo masiku ao sadzafikira nusu; koma ine ndidzakhulupirira Inu.