Read Chichewa Buku Lopatulika Bible 2014 MASALIMO 57 Bible Online

MASALIMO 57 - Chichewa Buku Lopatulika Bible 2014 bible

MASALIMO 57

¹Kwa Mkulu wa Nyimbo; pa Altasheti; Mikitamu wa Davide: muja anathawa Saulo, ali m'phanga. Mundichitire chifundo, Mulungu, mundichitire chifundo; pakuti moyo wanga ukhulupirira Inu, ndipo ndithawira kumthunzi wa mapiko anu, kufikira zosakazazo zidzapita.

²Ndidzafuulira kwa Mulungu Wam'mwambamwamba; ndiye Mulungu wonditsirizira zonse.

³Adzanditumizira m'mwamba, nadzandipulumutsa ponditonza wofuna kundimeza; Mulungu adzatumiza chifundo chake ndi choonadi chake.

⁴Moyo wanga uli pakati pa mikango; ndigona pakati pa oyaka moto, ndiwo ana a anthu amene mano ao ali nthungo ndi mivi, ndipo lilime lao ndilo lupanga lakuthawa.

⁵Mukwezeke m'mwambamwamba, Mulungu; ulemerero wanu ukhale pamwamba pa dziko lonse lapansi.

⁶Ananditchera ukonde apo ndiyenda; moyo wanga wawerama. Anandikumbira mbuna patsogolo panga; anagwa m'kati mwake iwo okha.

⁷Mtima wanga wakhazikika, Mulungu, ndakhazika mtima; ndidzaimba, inde, ndidzaimba zolemekeza.

⁸Galamuka, ulemu wanga; galamukani chisakasa ndi zeze! Ndidzauka ndekha mamawa.

⁹Ndidzakuyamikirani mwa anthu, Ambuye, ndidzakuimbirani mwa mitundu.

¹⁰Pakuti chifundo chanu nchachikulu kufikira m'mwamba, ndi choonadi chanu kufikira mitambo.

¹¹Kwezekani m'mwambamwamba, Mulungu; ulemerero wanu ukhale pamwamba m'dziko lonse lapansi.