Read Chichewa Buku Lopatulika Bible 2014 MASALIMO 59 Bible Online

MASALIMO 59 - Chichewa Buku Lopatulika Bible 2014 bible

MASALIMO 59

¹Kwa Mkulu wa Nyimbo; pa Altasheti. Mikitamu wa Davide. Muja Saulo anatuma anthu adikire nyumba yake, kuti amuphe. Ndilanditseni kwa adani anga, Mulungu wanga, ndiikeni pamsanje kwa iwo akundiukira.

²Mundilanditse kwa ochita zopanda pake, ndipo ndipulumutseni kwa anthu olira mwazi.

³Pakuti onani, alalira moyo wanga; amphamvu andipangira chiwembu, osachimwa, osalakwa ine, Yehova,

⁴osawapatsa chifukwa ine, athamanga nadzikonza. Galamukani kukomana nane, ndipo penyani.

⁵Ndinu Yehova, Mulungu wa makamu, Mulungu wa Israele. Ukani kukazonda amitundu onse, musachitire chifundo mmodzi yense wakuchita zopanda pake monyenga.

⁶Abwera madzulo, auwa ngati galu, nazungulira mudzi.

⁷Onani abwetuka pakamwa pao; m'milomo mwao muli lupanga, pakuti amati, Amva ndani?

⁸Koma Inu, Yehova, mudzawaseka; mudzalalatira amitundu onse.

⁹Inu, mphamvu yanga, ndidzakulindirani; pakuti Mulungu ndiye msanje wanga.

¹⁰Mulungu wa chifundo changa adzandichingamira, adzandionetsa tsoka la adani anga.

¹¹Musawapheretu, angaiwale anthu anga, muwabalalitse mwa mphamvu yanu, ndipo muwagwetse, Ambuye, ndinu chikopa chathu.

¹²Pakamwa pao achimwa ndi mau onse a pa milomo yao, potero akodwe m'kudzitamandira kwao, ndiponso chifukwa cha kutemberera ndi bodza azilankhula.

¹³Muwathe mumkwiyo, muwagulule psiti. Ndipo adziwe kuti Mulungu ndiye woweruza m'Yakobo, kufikira malekezero a dziko la pansi.

¹⁴Ndipo abwere madzulo, auwe ngati galu, nazungulire mudzi.

¹⁵Ayendeyende ndi kufuna chakudya, nachezere osakhuta.

¹⁶Koma ine, ndidzaimbira mphamvu yanu; inde ndidzaimbitsa chifundo chanu mamawa, pakuti Inu mwakhala msanje wanga, ndi pothawirapo ine tsiku la nsautso yanga.

¹⁷Ndidzaimbira zakukulemekezani Inu, mphamvu yanga; pakuti Mulungu ndiye msanje wanga, Mulungu wa chifundo changa.