Read Chichewa Buku Lopatulika Bible 2014 MASALIMO 66 Bible Online

MASALIMO 66 - Chichewa Buku Lopatulika Bible 2014 bible

MASALIMO 66

¹Kwa Mkulu wa Nyimbo. Nyimbo, Salimo. Fuulirani kwa Mulungu, dziko lonse lapansi.

²Imbirani ulemerero wa dzina lake; pomlemekeza mumchitire ulemerero.

³Nenani kwa Mulungu, Ha, ntchito zanu nzoopsa nanga! Chifukwa cha mphamvu yanu yaikulu adani anu adzagonjera Inu.

⁴Dziko lonse lapansi lidzakugwadirani, ndipo lidzakuimbirani; ndzaimbira dzina lanu.

⁵Idzani, muone ntchito za Mulungu; zochitira Iye ana a anthu nzoopsa.

⁶Anasanduliza nyanja ikhale mtunda. Anaoloka mtsinje choponda pansi, apo tinakondwera mwa Iye.

⁷Achita ufumu mwa mphamvu yake kosatha; maso ake ayang'anira amitundu; opikisana ndi Iye asadzikuze.

⁸Lemekezani Mulungu wathu, mitundu ya anthu inu, ndipo mumveketse liu la chilemekezo chake.

⁹Iye amene asunga moyo wathu tingafe, osalola phazi lathu literereke.

¹⁰Pakuti munatiyesera, Mulungu, munatiyenga monga ayenga siliva.

¹¹Munapita nafe kuukonde; munatisenza chothodwetsa pamsana pathu.

¹²Munapititsa anthu oberekeka pamwamba pamitu pathu; tinapyola moto ndi madzi; koma munatifikitsa potitsitsimutsa.

¹³Ndidzalowa m'nyumba yanu ndi nsembe zopsereza, ndidzakuchitirani zowinda zanga,

¹⁴zimene inazitchula milomo yanga, ndinazinena pakamwa panga posautsika ine.

¹⁵Ndidzakufukizirani nsembe zopsereza zonona, pamodzi ndi chofukiza cha mphongo za nkhosa; ndidzakonza ng'ombe pamodzi ndi mbuzi.

¹⁶Idzani, imvani, inu nonse akuopa Mulungu, ndipo ndidzafotokozera zonse anazichitira moyo wanga.

¹⁷Ndinamfuulira Iye pakamwa panga, ndipo ndinamkuza ndi lilime langa.

¹⁸Ndikadasekera zopanda pake m'mtima mwanga, Ambuye sakadamvera.

¹⁹Koma Mulungu anamvadi; anamvera mau a pemphero langa.

²⁰Wolemekezeka Mulungu, amene sanandipatutsire ine pemphero langa, kapena chifundo chake.