Read Chichewa Buku Lopatulika Bible 2014 MASALIMO 69 Bible Online

MASALIMO 69 - Chichewa Buku Lopatulika Bible 2014 bible

MASALIMO 69

¹Kwa Mkulu wa Nyimbo. Pa Syosyanimu. Salimo la Davide. Ndipulumutseni Mulungu; pakuti madzi afikira moyo wanga.

²Ndamira m'thope lozama, lopanda poponderapo; ndalowa m'madzi ozama, ndipo chigumula chandimiza.

³Ndalema ndi kufuula kwanga; kum'mero kwauma gwa! M'maso mwanga mwada poyembekeza Mulungu wanga.

⁴Ondida kopanda chifukwa achuluka koposa tsitsi la pamutu panga; ofuna kunditha, ndiwo adani anga monama, ali ndi mphamvu. Pamenepo andibwezetsa chosafunkha ine.

⁵Mulungu, mudziwa kupusa kwanga; ndipo kutsutsika kwanga sikubisikira Inu.

⁶Iwo akuyembekeza Inu, Ambuye Yehova wa makamu, asachite manyazi chifukwa cha ine, iwo ofuna Inu, Mulungu wa Israele, asapepulidwe chifukwa cha ine.

⁷Pakuti ndalola chotonza chifukwa cha Inu, chimpepulo chakuta nkhope yanga.

⁸Abale anga andiyesa mlendo, ndi ana a mai wanga andiyesa wa mtundu wina.

⁹Pakuti changu cha pa nyumba yanu chandidya; ndi zotonza za iwo otonza Inu zandigwera ine.

¹⁰Ndipo ndinalira pa kusala kwa moyo wanga, koma uku kunandikhalira chotonza.

¹¹Ndipo chovala changa ndinayesa chiguduli, koma amandiphera mwambi.

¹²Okhala pachipata akamba za ine; ndipo oledzera andiimba.

¹³Koma ine, pemphero langa lili kwa Inu, Yehova, m'nyengo yolandirika; Mulungu, mwa chifundo chanu chachikulu, mundivomereze ndi choonadi cha chipulumutso chanu.

¹⁴Mundilanditse kuthope, ndisamiremo, ndilanditseni kwa iwo akundida, ndi kwa madzi ozama.

¹⁵Chigumula chisandifotsere, ndipo chakuya chisandimize; ndipo asanditsekere pakamwa pake pa dzenje.

¹⁶Mundiyankhe Yehova; pakuti chifundo chanu nchokoma; munditembenukire monga mwa unyinji wa nsoni zokoma zanu.

¹⁷Ndipo musabisire nkhope yanu mtumiki wanu; pakuti ndisautsika ine; mundiyankhe msanga.

¹⁸Yandikizani moyo wanga, ndi kuuombola; ndipulumutseni chifukwa cha adani anga.

¹⁹Mudziwa chotonza changa, ndi manyazi anga, ndi chimpepulo changa. Akundisautsa ali pamaso panu.

²⁰Chotonza chandiswera mtima, ndipo ndidwala ine; ndipo ndinayembekeza wina wondichitira chifundo, koma palibe; ndinayembekeza onditonthoza mtima, osawapeza.

²¹Ndipo anandipatsa ndulu ikhale chakudya changa; nandimwetsa vinyo wosasa pomva ludzu ine.

²²Gome lao likhale msampha pamaso pao; pokhala ndi mtendere iwo, likhale khwekhwe.

²³M'maso mwao mude, kuti asapenye; ndipo munjenjemeretse m'chuuno mwao kosalekeza.

²⁴Muwatsanulire mkwiyo wanu, ndipo moto wa ukali wanu uwagwere.

²⁵Pokhala pao pakhale bwinja; m'mahema mwao musakhale munthu.

²⁶Pakuti alondola amene Inu munampanda; ndipo akambirana za zowawa zao za iwo amene munawalasa.

²⁷Onjezani mphulupulu pa mphulupulu zao; ndipo asafikire chilungamo chanu.

²⁸Afafanizidwe m'buku lamoyo, ndipo asalembedwe pamodzi ndi olungama.

²⁹Koma ine ndine wozunzika ndi womva zowawa; chipulumutso chanu, Mulungu, chindikweze pamsanje.

³⁰Ndidzalemekeza dzina la Mulungu ndi kuliimbira, ndipo ndidzambukitsa ndi kumyamika.

³¹Ndipo chidzakomera Yehova koposa ng'ombe, inde mphongo za nyanga ndi ziboda.

³²Ofatsa anachiona, nakondwera, ndipo inu, ofuna Mulungu, mtima wanu ukhale ndi moyo.

³³Pakuti Yehova amvera aumphawi, ndipo sapeputsa am'ndende ake.

³⁴Zakumwamba ndi dziko lapansi zimlemekeze, nyanja ndi zonse zoyenda m'mwemo.

³⁵Pakuti Mulungu adzapulumutsa Ziyoni, nadzamanga midzi ya Yuda; ndipo iwo adzakhala komweko, likhale laolao.

³⁶Ndipo mbumba ya atumiki ake idzalilandira; ndipo iwo akukonda dzina lake adzakhala m'mwemo.