Read Chichewa Buku Lopatulika Bible 2014 MASALIMO 71 Bible Online

MASALIMO 71 - Chichewa Buku Lopatulika Bible 2014 bible

MASALIMO 71

¹Ndikhulupirira Inu, Yehova. Ndisachite manyazi nthawi zonse.

²Ndikwatuleni m'chilungamo chanu, ndi kundilanditsa, nditcherereni khutu lanu ndi kundipulumutsa.

³Mundikhalire thanthwe lokhalamo, lopitako kosaleka; mwalamulira kundipulumutsa; popeza Inu ndinu thanthwe langa ndi linga langa.

⁴Ndilanditseni, Mulungu wanga, m'dzanja la woipa, m'dzanja la munthu wosalungama ndi wachiwawa.

⁵Pakuti Inu ndinu chiyembekezo changa, Ambuye Yehova; mwandikhalira wokhulupirika kuyambira ubwana wanga.

⁶Inu munandigwiriziza kuyambira ndisanabadwe, kuyambira pa thupi la mai wanga wondichitira zokoma ndinu; ndidzakulemekezani kosalekeza.

⁷Ndikhala chodabwitsa kwa ambiri; koma Inu ndinu pothawira panga polimba.

⁸M'kamwa mwanga mudzadzala lemekezo lanu, ndi ulemu wanu tsiku lonse.

⁹Musanditaye mu ukalamba wanga; musandisiye, pakutha mphamvu yanga.

¹⁰Pakuti adani anga alankhula za ine; ndipo iwo akulalira moyo wanga apangana upo,

¹¹ndi kuti, Wamsiya Mulungu. Mlondoleni, mgwireni; popeza palibe wompulumutsa.

¹²Musandikhalire kutali, Mulungu; fulumirani kundithandiza, Mulungu.

¹³Adani a moyo wanga achite manyazi, nathawe; chotonza ndi chimpepulo zikute ondifunira choipa.

¹⁴Koma ine ndidzayembekeza kosaleka, ndipo ndidzaonjeza kukulemekezani.

¹⁵Pakamwa panga padzafotokozera chilungamo chanu, ndi chipulumutso chanu tsiku lonse; pakuti sindidziwa mawerengedwe ake.

¹⁶Ndidzamuka mu mphamvu ya Ambuye Yehova; ndidzatchula chilungamo chanu, inde chanu chokha.

¹⁷Mulungu, mwandiphunzitsa kuyambira ubwana wanga; ndipo kufikira lero ndilalikira zodabwitsa zanu.

¹⁸Poteronso pokalamba ine ndi kukhala nazo imvi musandisiye, Mulungu; kufikira nditalalikira mbadwo uwu za dzanja lanu, mphamvu yanu kwa onse akudza m'mbuyo.

¹⁹Chilungamo chanunso, Mulungu, chifikira kuthambo; Inu amene munachita zachikulu, akunga Inu ndani, Mulungu?

²⁰Inu, amene munationetsa nsautso zambiri ndi zoipa, mudzatipatsanso moyo, ndi kutitenganso munsi mwa dziko.

²¹Mundionjezere ukulu wanga, ndipo munditembenukire kundisangalatsa.

²²Ndiponso ndidzakuyamikani ndi chisakasa, kubukitsa choonadi chanu, Mulungu wanga; ndidzakuimbirani nyimbo ndi zeze, ndinu Woyerayo wa Israele.

²³Milomo yanga idzafuula mokondwera poimbira Inu nyimbo; inde, moyo wanga umene munaombola.

²⁴Lilime langa lomwe lidzalankhula za chilungamo chanu tsiku lonse, pakuti ofuna kundichitira choipa achita manyazi, nadodoma.