Read Chichewa Buku Lopatulika Bible 2014 MASALIMO 72 Bible Online

MASALIMO 72 - Chichewa Buku Lopatulika Bible 2014 bible

MASALIMO 72

¹Salimo la kwa Solomoni. Patsani mfumu maweruzo anu, Mulungu, ndi mwana wa mfumu chilungamo chanu.

²Potero adzanenera anthu anu mlandu ndi m'chilungamo, ndi ozunzika anu ndi m'chiweruzo.

³Mapiri adzatengera anthu mtendere, timapiri tomwe, m'chilungamo.

⁴Adzaweruza ozunzika a mwa anthu, adzapulumutsa ana aumphawi, nadzaphwanya wosautsa.

⁵Adzakuopani momwe likhalira dzuwa ndi mwezi, kufikira mibadwomibadwo.

⁶Adzanga mvula yakugwa pa udzu wosenga, monga mvula yothirira dziko.

⁷Masiku ake wolungama adzakhazikika; ndi mtendere wochuluka, kufikira sipadzakhala mwezi.

⁸Ndipo adzachita ufumu kuchokera kunyanja kufikira kunyanja, ndi kuchokera ku Mtsinje kufikira malekezero a dziko lapansi.

⁹Okhala m'chipululu adzagwadira pamaso pake; ndi adani ake adzaluma nthaka.

¹⁰Mafumu a ku Tarisisi ndi ku Zisumbuzo adzabwera nacho chopereka; mafumu a ku Sheba ndi Seba adzadza nazo mphatso.

¹¹Inde mafumu onse adzamgwadira iye, amitundu onse adzamtumikira.

¹²Pakuti adzapulumutsa waumphawi wofuulayo; ndi wozunzika amene alibe mthandizi.

¹³Adzachitira nsoni wosauka ndi waumphawi, nadzapulumutsa moyo wa aumphawi.

¹⁴Adzaombola moyo wao ku chinyengo ndi chiwawa; ndipo mwazi wao udzakhala wa mtengo pamaso pake.

¹⁵Ndipo iye adzakhala ndi moyo; ndipo adzampatsa golide wa ku Sheba; nadzampempherera kosalekeza; adzamlemekeza tsiku lonse.

¹⁶M'dzikomo mudzakhala dzinthu dzochuluka pamwamba pa mapiri; zipatso zake zidzati waa, ngati za ku Lebanoni, ndipo iwo a m'mudzi adzaphuka ngati msipu wapansi.

¹⁷Dzina lake lidzakhala kosatha, momwe likhalira dzuwa dzina lake lidzamvekera zidzukulu. Ndipo anthu adzadalitsidwa mwa Iye; amitundu onse adzamutcha wodala.

¹⁸Wolemekezeka Yehova Mulungu, Mulungu wa Israele, amene achita zodabwitsa yekhayo.

¹⁹Ndipo dzina lake la ulemerero lidalitsike kosatha; ndipo dziko lonse lapansi lidzale nao ulemerero wake. Amen, ndi Amen.

²⁰Mapemphero a Davide mwana wa Yese atha.