Read Chichewa Buku Lopatulika Bible 2014 MASALIMO 73 Bible Online

MASALIMO 73 - Chichewa Buku Lopatulika Bible 2014 bible

MASALIMO 73

¹Salimo la Asafu. Indedi Mulungu achitira Israele zabwino, iwo a mtima wa mbee.

²Koma ine, ndikadagwa; mapazi anga akadaterereka.

³Pakuti ndinachitira nsanje odzitamandira, pakuona mtendere wa oipa.

⁴Pakuti palibe zomangira pakufa iwo, ndi mphamvu yao njolimba.

⁵Savutika monga anthu ena; sasautsika monga anthu ena.

⁶Chifukwa chake kudzikuza kunga unyolo pakhosi pao; achivala chiwawa ngati malaya.

⁷Kunenepa kwao kutuzulitsa maso ao, malingaliro a mitima yao asefukira.

⁸Achita zaphwete nalankhula moipa za kusautsa, alankhula modzitama.

⁹Pakamwa pao anena zam'mwamba, ndipo lilime lao liyendayenda m'dziko lapansi.

¹⁰Chifukwa chake anthu ake amabwera kudza kuno, ndipo chikho chodzala ndi madzi achigugudiza.

¹¹Namati, Akachidziwa bwanji Mulungu? Kodi Wam'mwambamwamba ali nayo nzeru?

¹²Tapenyani, oipa ndi awa; ndipo pokhazikika chikhazikikire aonjezerapo pa chuma chao.

¹³Indedi, ndinayeretsa mtima wanga kwachabe, ndipo ndinasamba m'manja mosalakwa.

¹⁴Popeza andisautsa tsiku lonse, nandilanga mamawa monse,

¹⁵ndikadati, Ndidzafotokozera chotere, taonani, ndikadachita chosakhulupirika ndi mbadwo wa ana ako.

¹⁶Pamene ndinayesa kudziwitsa ichi, ndinavutika nacho;

¹⁷mpaka ndinalowa m'zoyera za Mulungu, ndi kulingalira chitsiriziro chao.

¹⁸Indedi muwaika poterera, muwagwetsa kuti muwaononge.

¹⁹Ha? M'kamphindi ayesedwa bwinja; athedwa konse ndi zoopsa.

²⁰Monga anthu atauka, apepula loto; momwemo, Inu Ambuye, pakuuka mudzapeputsa chithunzithunzi chao.

²¹Pakuti mtima wanga udawawa, ndipo ndinalaswa m'impso zanga;

²²ndinali wam'thengo, wosadziwa kanthu; ndinali ngati nyama pamaso panu.

²³Koma ndikhala ndi Inu chikhalire, mwandigwira dzanja langa la manja.

²⁴Mudzanditsogolera ndi uphungu wanu, ndipo mutatero, mudzandilandira m'ulemerero.

²⁵Ndili ndi yani Kumwamba, koma Inu? Ndipo pa dziko lapansi palibe wina wondikonda koma Inu.

²⁶Likatha thupi langa ndi mtima wanga, Mulungu ndiye thanthwe la mtima wanga, ndi cholandira changa chosatha.

²⁷Pakuti, taonani, iwo okhala patali ndi Inu adzaonongeka; muononga onse akupembedza kwina, kosiyana ndi Inu.

²⁸Koma ine, kundikomera kuyandikiza kwa Mulungu. Ndimuyesa Ambuye Yehova pothawirapo ine, kuti ndifotokozere ntchito zanu zonse.