Read Chichewa Buku Lopatulika Bible 2014 MASALIMO 74 Bible Online

MASALIMO 74 - Chichewa Buku Lopatulika Bible 2014 bible

MASALIMO 74

¹Chilangizo cha Asafu. Mulungu, munatitayiranji chitayire? Mkwiyo wanu ufukiranji pa nkhosa za kubusa kwanu?

²Kumbukirani msonkhano wanu, umene munaugula kale, umene munauombola ukhale fuko la cholandira chanu; Phiri la Ziyoni limene mukhalamo.

³Nyamulani mapazi anu kukapenya mapasukidwe osatha, zoipa zonse adazichita mdani m'malo opatulika.

⁴Otsutsana ndi Inu abangula pakati pa msonkhano wanu; aika mbendera zao zikhale zizindikiro.

⁵Anaoneka ngati osamula nkhwangwa kunkhalango.

⁶Ndipo tsopano aphwanya zosemeka zake zonse ndi nkhwangwa ndi nyundo.

⁷Anatentha malo anu opatulika; anaipsa ndi kugwetsa pansi mokhalamo dzina lanu.

⁸Ananena mumtima mwao, Tiwapasule pamodzi; anatentha zosonkhaniramo za Mulungu zonse, m'dzikomo.

⁹Sitiziona zizindikiro zathu; palibenso mneneri; ndipo mwa ife palibe wina wakudziwa mpaka liti.

¹⁰Wotsutsanayo adzatonza kufikira liti, Mulungu? Kodi mdani adzanyoza dzina lanu nthawi yonse?

¹¹Mubwezeranji dzanja lanu, ndilo dzanja lamanja lanu? Mulitulutse kuchifuwa chanu ndipo muwatheretu.

¹²Koma Mulungu ndiye mfumu yanga kuyambira kale, wochita zakupulumutsa pakati pa dziko lapansi.

¹³Mudagawa nyanja ndi mphamvu yanu; mudaswa mitu ya zoopsa za m'madzi.

¹⁴Mudaphwanya mitu ya Leviyatani; mudampereka akhale chakudya cha zilombo za m'chipululu.

¹⁵Mudagawa kasupe ndi mtsinje; mudaphwetsa mitsinje yaikulu.

¹⁶Usana ndi wanu, usikunso ndi wanu, munakonza kuunika ndi dzuwa.

¹⁷Munaika malekezero onse a dziko lapansi; munalenga dzinja ndi malimwe.

¹⁸Mukumbukire ichi, Yehova, mdaniyo anatonza, ndipo anthu opusa ananyoza dzina lanu.

¹⁹Musapereke moyo wa njiwa yanu kwa chilombo; musamaiwala moyo wa ozunzika anu nthawi yonse.

²⁰Samalirani chipanganocho; pakuti malo a mdima a m'dziko adzala ndi zokhalamo chiwawa.

²¹Okhalira mphanthi asabwere nao manyazi; wozunzika ndi waumphawi alemekeze dzina lanu.

²²Nyamukani, Mulungu, mudzinenere mlandu nokha; kumbukirani momwe akutonzani wopusa tsiku lonse.

²³Musaiwale mau a iwo otsutsana ndi Inu; kusokosera kwa iwo akuukirani Inu kumakwera kosaleka.