Read Chichewa Buku Lopatulika Bible 2014 MASALIMO 75 Bible Online

MASALIMO 75 - Chichewa Buku Lopatulika Bible 2014 bible

MASALIMO 75

¹Kwa Mkulu wa Nyimbo; Altasyeti; Salimo la Asafu. Nyimbo. Tikuyamikani Inu, Mulungu; tiyamika, pakuti dzina lanu lili pafupi; afotokozera zodabwitsa zanu.

²Pakuona nyengo yake ndidzaweruza molunjika.

³Lasungunuka dziko lapansi, ndi onse okhalamo; ndinachirika mizati yake.

⁴Ndinati kwa odzitamandira, musamachita zodzitamandira; ndi kwa oipa, Musamakweza nyanga;

⁵musamakwezetsa nyanga yanu; musamalankhula ndi khosi louma.

⁶Pakuti kukuzaku sikuchokera kum'mawa, kapena kumadzulo, kapena kuchipululu.

⁷Pakuti Mulungu ndiye woweruza; achepsa wina, nakuza wina.

⁸Pakuti m'dzanja la Yehova muli chikho; ndi vinyo wake achita thovu; chidzala ndi zosanganizira, ndipo atsanulako. Indedi, oipa onse a pa dziko lapansi adzamwa nadzagugudiza nsenga zake.

⁹Koma ine ndidzalalikira kosalekeza, ndidzaimbira zomlemekeza Mulungu wa Yakobo.

¹⁰Ndipo ndidzatseteka nyanga zonse za oipa; koma nyanga za wolungama zidzakwezeka.