Read Chichewa Buku Lopatulika Bible 2014 MASALIMO 79 Bible Online

MASALIMO 79 - Chichewa Buku Lopatulika Bible 2014 bible

MASALIMO 79

¹Salimo la Asafu. Mulungu, akunja alowa m'cholandira chanu; anaipsa Kachisi wanu woyera; anachititsa Yerusalemu bwinja.

²Anapereka mitembo ya atumiki anu ikhale chakudya cha mbalame za mlengalenga, nyama ya okondedwa anu anaipereka kwa zilombo za m'dziko.

³Anakhetsa mwazi wao ngati madzi pozungulira Yerusalemu; ndipo panalibe wakuwaika.

⁴Takhala chotonza cha anansi athu, ndi choseketsa ndi cholalatitsa iwo akutizinga.

⁵Yehova, mudzakwiya nthawi zonse kufikira liti? Nidzatentha nsanje yanu ngati moto?

⁶Thirirani mkwiyo wanu pa akunja osadziwa Inu, ndi pa maufumu osaitana pa dzina lanu.

⁷Pakuti anathera Yakobo, napasula pokhalira iye.

⁸Musakumbukire motitsutsa mphulupulu za makolo athu; nsoni zokoma zanu zitipeze msanga, pakuti tafooka kwambiri.

⁹Tithandizeni Mulungu wa chipulumutso chathu, chifukwa cha ulemerero wa dzina lanu; ndipo tilanditseni, ndi kutifafanizira zoipa zathu, chifukwa cha dzina lanu.

¹⁰Anenerenji amitundu, Ali kuti Mulungu wao? Kubwezera chilango cha mwazi wa atumiki anu umene anaukhetsa kudziwike pakati pa amitundu pamaso pathu.

¹¹Kubuula kwa wandende kufike kuli Inu; monga mwa mphamvu yanu yaikulu lolani ana a imfa atsale.

¹²Ndipo anansi athu amene anatonza Inu muwabwezere chotonza chao, kasanu ndi kawiri kumtima kwao, Ambuye.

¹³Potero ife anthu anu ndi nkhosa zapabusa panu tidzakuyamikani kosatha; tidzafotokozera chilemekezo chanu ku mibadwomibadwo.