Read Chichewa Buku Lopatulika Bible 2014 MASALIMO 80 Bible Online

MASALIMO 80 - Chichewa Buku Lopatulika Bible 2014 bible

MASALIMO 80

¹Kwa Mkulu wa Nyimbo; pa Syosyanimu; lochita mboni; Salimo la Asafu. Mbusa wa Israele, tcherani khutu; inu wakutsogolera Yosefe ngati nkhosa; inu wokhala pa akerubi, walitsani.

²Utsani chamuna chanu pamaso pa Efuremu ndi Benjamini ndi Manase, ndipo mutidzere kutipulumutsa.

³Mutibweze, Mulungu; nimuwalitse nkhope yanu, ndipo tidzapulumuka.

⁴Yehova, Mulungu wa makamu, mudzakwiyira pemphero la anthu anu kufikira liti?

⁵Munawadyetsa mkate wa misozi, ndipo munawamwetsa misozi yambiri.

⁶Mutiika kuti atilimbirane anzathu; ndipo adani athu atiseka mwa iwo okha.

⁷Mulungu wa makamu, mutibweze; nimuwalitse nkhope yanu, ndipo tidzapulumuka.

⁸Mudatenga mpesa kuchokera ku Ejipito, munapirikitsa amitundu ndi kuuoka uwu.

⁹Mudasoseratu pookapo, idagwiritsa mizu yake, ndipo unadzaza dziko.

¹⁰Mthunzi wake unaphimba mapiri, ndi nthambi zake zikunga mikungudza ya Mulungu.

¹¹Unatambalitsa mphanda zake mpaka kunyanja, ndi mitsitsi yake kufikira ku Mtsinje.

¹²Munapasuliranji maphambo ake, kotero kuti onse akupita m'njira atcherako?

¹³Nguluwe zochokera kuthengo ziukumba, ndi nyama za kuchidikha ziudya.

¹⁴Bwererani, tikupemphani, Mulungu wa makamu; suzumirani muli m'mwamba, nimupenye, ndi kuzonda mpesa uwu,

¹⁵ndi tsinde limene dzanja lanu lamanja linaoka, ndi mphanda munadzilimbikitsira.

¹⁶Unapserera ndi moto, unadulidwa; aonongeka pa kudzudzula kwa nkhope yanu.

¹⁷Dzanja lanu likhale pa munthu wa pa dzanja lamanja lanu; pa mwana wa munthu amene munadzilimbikitsira.

¹⁸Potero sitidzabwerera m'mbuyo kukusiyani; titsitsimutseni, ndipo tidzaitanira dzina lanu.

¹⁹Mutibweze, Yehova Mulungu wa makamu; nimuwalitse nkhope yanu, ndipo tidzapulumuka.