Read Chichewa Buku Lopatulika Bible 2014 MASALIMO 83 Bible Online

MASALIMO 83 - Chichewa Buku Lopatulika Bible 2014 bible

MASALIMO 83

¹Nyimbo. Salimo la Asafu. Mulungu musakhale chete; musakhale duu, osanena kanthu, Mulungu.

²Pakuti taonani, adani anu aphokosera, ndipo okwiyira Inu aweramutsa mutu.

³Apangana mochenjerera pa anthu anu, nakhalira upo pa obisika anu.

⁴Amati, Tiyeni tiwaononge asakhalenso mtundu wa anthu; ndipo dzina la Israele lisakumbukikenso.

⁵Pakuti anakhalira upo ndi mtima umodzi; anachita chipangano cha pa Inu.

⁶Mahema a Edomu ndi a Aismaele; Mowabu ndi Ahagiri;

⁷Gebala ndi Amoni ndi Amaleke; Filistiya, pamodzi ndi iwo okhala m'Tiro.

⁸Asiriya anaphatikana nao; anakhala dzanja la ana a Loti.

⁹Muwachitire monga munachitira Midiyani; ndi Sisera, ndi Yabini kumtsinje wa Kisoni,

¹⁰amene anaonongeka ku Endori; anakhala ngati ndowe ya kumunda.

¹¹Muwaike akulu ao ngati Orebu ndi Zeebu; mafumu ao ngati Zeba ndi Zalimuna,

¹²amene anati, Tilande malo okhalamo Mulungu, akhale athu.

¹³Mulungu wanga, muwaike akhale ngati mungu; ngati ziputu zomka ndi mphepo.

¹⁴Monga moto upsereza nkhalango, ndi monga lawi liyatsa mapiri.

¹⁵Momwemo muwatsate ndi namondwe, nimuwaopse ndi kamvulumvulu wanu.

¹⁶Achititseni manyazi pankhope pao; kuti afune dzina lanu, Yehova.

¹⁷Achite manyazi, naopsedwe kosatha; ndipo asokonezeke, naonongeke.

¹⁸Kuti adziwe kuti inu nokha, dzina lanu ndinu Yehova, ndinu Wam'mwambamwamba pa dziko lonse lapansi.